KUVUNGUZA umoya wokuhlukana phakathi kwinhlangano yezepolitiki i-EFF njengoba sekuvele imibiko ethi iphini likamengameli wenhlangano uMnuz Floyd Shivambu noNobhala-Jikelele uMnuz Godrich Gardee bangase bakhishwe ezikhundleni zabo.
Lezi zindaba zivela nje, ngoDisemba 13 nango-16, i-EFF izoqoka ubuholi obusha kwinkomfa ezobanjelwa eNasrec Expo Centre, eGoli.
Imithombo engaphakathi kwi-EFF iveze ukuthi isikhala sikaShivambu kungenzeka sivalwe uSihlalo wenhlangano kuzwelonke uMnuz Dali Mpofu. Isikhulumi senhlangano kuzwelonke uMnuz Mbuyiseni Ndlozi nelungu lekomidi kuzwelonke uMnuz Marshal Dlamini bathishwa ukuba bavale isikhala sikaGardee.
Abe-Independent Media batshelwe ukuthi iningi lamalungu e-EFF akhathazekile ngomsebenzi kaShivambu noGardee, okuthiwa bahluleke ukukhangisa inhlangano emazweni ase-Afrika.
Elinye ilunga le-EFF elingathanda ukudalulwa igama, liveze ukuthi umengameli wenhlangano uMnuz Julius Malema nguyena kuphela ophephile esikhundleni sakhe.
Imithombo ithe i-EFF isihlukene phakathi kabili, kanti womabili amaqembu aseka ubuholi bukaMalema.
“Elinye iqembu lifuna isekela mengameli akhishwe, agcinwe njengelungu lekomidi lalenhlangano kuzwelonke. Usolwa ngokuhluleka ukwenza umsebenzi wakhe, ikakhulukazi ukukhangisa inhlangano emazweni ase-Afrika,” kuchaza umthombo.
Ngesikhathi i-EFF ivakashele eNasrec ngo-Okthoba, uMalema wakhuluma ngokuhluleka kwabanye abaholi ukukhangisa inhlangano emazweni ase-Afrika.
UMalema waveza ukuthi amazwe ase-Africa akhombisa ukuyithanda i-EFF kodwa inhlangano yahluleka ukusebenza lelo thuba.
Omunye umthombo uthe akuwona umsebenzi kaGardee ukukhangisa i-EFF emzaweni angaphandle, kodwa uMalema ubenganeme ngoShivambu ngokuhluleka ukwenza umsebenzi wakhe.
“Womabili amaqembu afuna umgcini mafa uLeigh-Ann Mathys akhishwe esikhundleni. Kukhona abafuna uVeronica Mente athathe izintambo kuDali Mpofu,” kuchaza lomthombo.