BAPHUME becijeke kuyo yonke imikhakha abesifazane ohlelweni lwaminyaka yonke olwenziwa yi-Independent Institute of Education (IIE) Varsity College, oluhlose ukubathuthukisa kwezomnotho nangokomqondo.
Babheme bakholwa abebehambele umcimbi, iLadies to Legends, olwenziwe yilesi sikhungo eThekwini ngaleli sonto. Lo mcimbi waminyaka yonke uhambisana nenkolelo yokuthi kuhlomula sonke isizwe uma kuqeqeshwa kahle ingane yentombazane.
Bekuxoxwa ngezinto eziningi zokuthuthukisa abesifazane, ikakhulukazi kwezemfundo. Izikhulumi bekunguCarol Mkhize ongunobuhle nomlingisi. Bekukhona noDkt Langa Mngoma naye obuye amodele noNksz Rowena Singh onguthisha noyimenenja yeLadies to Legends e-IIE’s Varsity College.
UDkt Mngoma ongudadewabo kaNandi Madida ongumculi nomlingisi, uyaziwa kwezokumodela ikakhulukazi ekukhangiseni ngezimonyo. Nonyaka uqokwe nabanye abesifazane ababili base-Afrika ekubeni amanxusa okukhangisa ngezinwele zemvelo. Ukhethwe noLee Litumbe waseCameroon noLaurie Frempong waseGhana kulo mkhankaso owenziwe yinkampani yezinwele iMizani.
Phakathi kwezihloko obekukhulunywa ngazo kubalwa ezempilo nokuziphatha kwabesifazane besimanje.
UCarol ophinde aqeqeshe abazivocavocayo, ukhulume ngengcindezi azithola ehlangabezana nayo ezama ukuzenza umuntu angayena ngesikhathi efika kwezokulingisa. Ufundise abesifazane ngokuthi ukuzivocavoca kungabasiza kanjani ukuze bakwazi ukuphila nasemqondweni.
UDkt Mngoma ugcizelele ukuzinakekela umzimba nangendlela yokudla efanele.
“Kumele sizifundise umkhuba wokudla ngendlela efanele nenempilo uma sifuna ukuphila kahle. Kubaluleke kakhulu ukuthi siqale ngokufundisa intsha ngalo mkhuba,” kusho yena.
UNkk Singh ugcizelele ukubaluleka kokufundisa izingane zamantombazane, athe owesifazane uyakwazi ukuzikhandla aphumelele uma efundile. Kucelwe nabanye abesifazane abebethamele lo mcimbi ukuthi baxoxe izindaba zabo ezingasiza abanye ukuze basekane. Kugcizelelwe ukuthi akukho abesifazane abangeke baphumelele ukukwenza uma bebambisene.
OyiManaging Director ye-IIE Varsity Collge uNkk Louise Wiseman uthe kubalulekile ukuzithuthukisa kwabesifazane yingakho bebiza abemikhakha ehlukene ukukhuthaza nabanye.
Uthe ngunyaka wesine kwaqala ukwenziwa lolu hlelo ngenhloso yokuthuthukisa abesifazane abasebasha. Uthe bathokoze kakhulu ngezihloko obekukhulunywa ngazo ezithinta abesifazane umhlaba wonke.
Kulo nyaka uthe umkhakha wezamabhizinisi kulesi sikhungo uzokhipha nomfundaze kwabayisishiyagalombili abafuna ukufunda khona.