Bahambisa amanzi kubantu

UNGQONGQOSHE wezokuBusa ngokuBambisana neziNdaba zoMdabu KwaZulu-Natal, uMnuz Sipho Hlomuka, useqinise umkhankaso wakhe wokuhambisa amathangi amanzi emphakathini ngenhloso yokwenza isiqiniseko sokuthi wonke umuntu unamanzi esifundazweni ikakhulukazi ngalesi sikhathi sobhubhane lweCorona.

UHlomuka usehambise amathangi amanzi angu-2 300 emiphakathini eyehlukene esifundazweni kusukela eqale umkhankaso wakhe.

Izolo uHlomuka neMeya yoMkhandlu waseHarry Gwala, uMnuz Zamo Nxumalo, iMeya yaseBuhlebezwe Nkk BE Ngubo, uSihlalo weNdlu yobuHoli boMdabu KwaZulu-Natal, Inkosi Phathisizwe Chiliza, bahambele iXopo Water Works.

Bafike bayihlola le ndawo, babheka nokuthi izokwazi yini ukugcwalisa amathangi amanzi.

“Ukuhanjiswa kwamanzi kuwumsebenzi obalulekile kahulumeni emkhankasweni wokulwa negciwane iCorona njengoba abantu bewadinga ukuze bakwazi ukuqinisekisa inhlanzeko,” kusho uHlomuka.

Umemezele ukuthi umnyango wakhe uzophinde uhambise amanye amathangi angu-1 700 emphakathini eyehlukene.

“Lokho kusho ukuthi isifundazwe sesinamathangi angu-4 000, esesiwadlulisele emphakathini, la mathangi athunyelwe emphakathini phezu kwama-borehole akhona,” kusho uHlomuka.

Uthe uMnyango wezaManzi nokuThuthwa kweNdle ezweni lonke wona ubanike amathangi angu-1 000, njengoba kuliwa neCovid-19.

“Njengomnyango sisebenza ngokubambisana neziphathimandla zamanzi ukwenza isiqiniseko sokuthi amanzi ayaya emphakathini,” kusho uHlomuka.

Uphinde waba nomhlangano nethimba lesifunda elibhekelele ukulwa negciwame iCorona elimnike umbiko mayelana nokusebenza kwemiyalelo ekhishwe nguMengameli Cyril Ramaphosa okuhloswe ngayo ukuqeda iCorona.

Uphinde wagcizelela ukubaluleka kweqhaza lamakhosi namakhansela ekuqinsesiseni ukuthi imithetho ebekwe nguhulumeni iyalandelwa.