IBAGIXABEZE ngenqwaba yodilikajele ngoLwesihlanu, iNkantolo eNkulu yaseThekwini, abesilisa abathathu abalahlwe amacala okubulala osomatekisi ezindaweni ezehlukene KwaZulu-Natal.
Laba besilisa oNkazimulo Ndlovu (28), Mzameleni Tsepo Majola (33) noMondli Fihlela (35), bagixabezwe ngodilikajele abangu-8, neminyaka engu-187 bebhadla ejele.
Phakathi kwamacala abalahlile kukhona awokubulala, awokuzama ukubulala, ukuthumba nokubamba inkunzi ngenhloso yokulimaza.
Ngokusho kokhulumela amaphoyisa KwaZulu-Natal, uColonel Robert Netshiunda, uthe lawa macala, laba besilisa bawenza eMayville, KwaDukuza, Empangeni naKwaMsane.
“INkantolo eNkulu yaseThekwini ibanike odilikajele abayisishiyagalombili neminyaka engu-187 bebhadla ejele,” kusho uNetshiunda.
Ecacisa ngamacala, uNetshiunda uthe edluliselwa yiziteshi zamaphoyisa ezehlukene esifundazweni ophikweni oluphenya amacala ayamaniswa nemboni yamatekisi esifundazweni, iProvincial Taxi Violence Unit.
Uveze ukuthi lolu phiko lwabe selubopha abasolwa abathathu ngoFebhuwari 2022, laphinde lakwazi ukuqinisekisa ukuthi abaphumi ngaphandle kwaze kwaba bayagwetshwa.
Uthe uNdlovu waseMpangeni ugixabezwe ngodilikajele abayisithupha neminyaka engu-92 ngaphezulu.
“UFihlela waseNdwedwe unikwe odilikajele ababili ebhadla ejele, waphinde wagixabezwa ngeminyaka engu-50 ngaphezulu,” kusho yena.
Uqhube wathi uMajola waseMkhandlwini, eMelmoth, uzobhadla ejele iminyaka engu-45.
Uthe bobathathu abalahlwe amacala, inkantolo ibuye yehlulela ukuthi akubafanele ukuba nezibhamu.
Khonamanjalo: Uphiko lwamaphoyisa iProvincial Murder and Robbery Unit, Point Tracing Team neMlazi Trio Task Team, lubophe umsolwa oneminyaka engu-28 oyamaniswa necala lokubulawa kwabayisishiyagalombili emijondolo yaseZamani kwa-U eMlaza, ngoMeyi, kulo nyaka.
“Amaphoyisa athole umkhondo elungwini lomphakathi, umsolwa wabhadanywa ebhace emijondolo yaseMhlabeni, eMlazi,” kusho uNetshiunda.
Uthe umsolwa okuvele ukuthi wakhishelwa incwadi egunyaza ukuboshwa kwakhe ngoNovemba, ngonyaka odlule, ngecala lokukhomba umuntu ngesibhamu, uzovela maduze enkantolo.