Ayavela amasosha abhekene nelokubulala us'gaxamabhande
Kuboshwe amasosha amabili ngamacala okubulala usgaxamabhande
Image: Umfanekiso ogciniweyo
BABILI abasolwa okulindeleke ukuthi bavele eNkantolo yeMantshi yaseRandburg ngecala okubulala nokuthumba.
Abasolwa okuyizikhulu ezimbili ze-SANDF, ezineminyaka engu-36 no-51 ubudala, ziboshwe ngeSonto, e-OR Tambo International Airport naseCenturion, ePitoli.
Laba baboshwe uphiko loKlebe oluphenya amacala abucayi, kanye neTactical Operations Management Section (TOMS).
Ukuboshwa kwabo kuhlobene nokubulawa kukaLieutenant Colonel Frans Mathipa, owadutshulwa washona ngesikhathi eshayela emgwaqeni onguthelawayeka u-N1 ngaseHammanskraal ngomhlaka-06 Agasti 2023. Ngesikhathi edutshulwa imoto ayehamba ngayo yaphaphalaza yawela emgodini.
ULieutenant Colonel Mothipa owadutshulwa wabulawa kuN1
Image: SAPS
ULieutenant Colonel Mathipa, besebenzela oKlebe ngaphansi kophiko lweSerious Organised Crime Investigation , eGauteng, ubesemsebenzini eqhuba uphenyo ngesikhathi eshona.
Uphenyo loKlebe lubaholele nasemotweni yomsolwa oneminyaka engu-36. Imoto kusolwa ukuthi yasetshenziswa ekuthunjweni amadoda amabili angowokufika kuleli enxanxatheleni yezitolo eMidrand ngomhlaka-29 Disemba 2022 ngaphambi kwecala lokubulala elenzeka ngonyaka olandelayo. Imoto izogcinwa emaphoyiseni njengoba kuqhutshekwa nophenyo.