AwaseKZN obishini lwezembe kwiPremiership
ULINDOKUHLE Zikhali obe yiqhawe emdlalweni odlule weRichards Bay FC oyibeke emaphuzwini angu-29
Image: BACKPAGEPIX
MABILI amaqembu aseKZN kwamahlanu ahleli ngokujeqeza ngenxa yokubambeka endaweni ewalengisela engcupheni yokugencwa yizembe ekupheleni kwesizini yeBetway Premiership ka-2024/2025.
ILamontville Golden Arrows neRichards Bay FC yiwona la maqembu akulesi sifundazwe ahleli ngesinqe esisodwa yize ikusasa lawo lisesezandleni zawo.
Amanye amaqembu ahleli ngokujeqeza ingozi yezembe yiCape Town City ebambe ibhuleki kwi-log, SuperSport United neMagesi FC.
Njengoba sekusemome ukuthi isongwe isizini ka-2024/2025, amaqembu aseqalile ukwethuka izanya ikakhulukazi lawo angahleli kahle kwi-log.
Kusukela i-Premier Soccer League (PSL) ixoshe iRoyal AM, sekucacile ukuthi yini okufanele yenziwe ngamaqembu ukugwema ukuyodlala eyokuhlunga namaqembu amabili azolala isibili nesithathu kwiMotsepe Foundation Championship.
Isizini isizosongwa ngemidlalo engu-28 kwazise isuswe yonke eyeThwihli Thwahla okwenza ibe mbalwa kakhulu esele ngaphambi kokuthi kucace ngokuzokwenzeka.
Angu-29 amaphuzu okungagcina kuwona amaCitizens abambe ibhuleki kwi-log ngamaphuzu angu-23.
Kubukeka kunzima nokho ukuthi iCape Town City ingafinyelela ku-29 kwazise isalelwe yimidlalo emibili enzima.
NgoMgqibelo izovakashela iPolokwane City ekhombisa izimpawu zokubuyelwa yifomu ngesikhathi esikahle, ngaphambi kokuvala isizini ngowabakhaya neStellenbosch FC eCape Town Stadium, eKapa.
IBay neMagesi sebevele bafikile kulo-29 wamaphuzu odingwa yiCity kodwa lokhu akusho ukuthi la maqembu kufanele azithambise kweyawo ewasalele.
Kufanele lokhu kuyikhulule iBay neMagesi ngoba ngisho iCity ingayiwina yomibili imidlalo yayo kodwa sikhulu isibalo samagoli okufanele iwashaye ukuze izibeke ebuhleni.
IBay isalelwe wumdlalo weGolden Arrows ekhaya noweSuperSport ekuhambeni. Inzima le midlalo kwiBay kwazise womabili la maqembu abalwa namahlanu ahleli ngokujeqeza.
Kwemithathu esalele iMagesi kuzoqala iMamelodi Sundowns, Marumo Gallants, ivale nge-Orlando Pirates.
ISuperSport enamaphuzu angu-26 isalelwe yimidlalo emine. Izobhekana neStellenbosch ekuhambeni ngoMgqibelo, Pirates neBay yomibili ekhaya.
Owesine kufanele iwudlale ne-Arrows kwazise wamiswa ngenxa yokungabibikho kukagesi enkundleni.
Kusobala ukuthi kukhona okuzohlelwa yi-PSL ngalo mdlalo ngoba ne-Arrows isalelwe yimidlalo emine nayo kodwa ngokoluhla lwemidlalo yale nhlangano kusele iPirates, Bay neSekhukhune United kowokusonga isizini. Kungenzeka i-Arrows igixabezwe ngamaphuzu amathathu.