UMASIPALA waseThekwini umise ukusebenza kwamabhasi kaMasipala ngenhloso yokunqanda ukubhebhetheka kwegciwane leCorona kubasebenzi nakubasebenzi bale nkampani.
Ngokwesitatimende esithunyelelwe abezindaba, ngaphambi kokuthathwa kwalesi sinqumo, idolobha liqale laxhumana nabanikazi benkampani elawula la mabhasi iTansnat, ngaphambi kokuba limise ukusebenza okwesikhashana kwamabhasi kusukela izolo kuze kube yikusasa.
Okhulumela umasipala, uMnuz Musawakhe Mayisela, uthe ukumiswa kwamabhasi kwenziwe ngenhloso yokuba kuhlanzwe wonke amabhasi namadepho ngezibulalimagciwane ukuze kuphephiswe abakusebenzisayo.
"Azobuyela emsebenzini ngoMsombuluko." Ukudayiswa kwaMuvo card kuzoqhubeka njengokwejwayelekile ukuze abagibeli bakwazi ukuwagcwalisa ukulungiselela ukuqala kokusebenza kwamabhasi ngoMsombuluko.
UMayisela uthe iTheku lizohlala ngaso sonke isikhathi liqikelela ukuphepha kwabasebenzi nomphakathi walo, ikakhulukazi njengoba leli zwe libhekene nalesi sihlava.
Ube esedlulisa okukhulu ukuxolisa emphakathini ngalobu buhixihixi obudalekile kubasebenzi futhi wanxusa amakhasimende ukuba uzame ezinye izinto zokuthutha umphakathi ukuze angasili dengwane.