Athole ibheyili amaphoyisa abulala uzakwabo

Amaphoyisa amabili, uSergeant Piet Matsoso, 38, noSergeant Siyabonga Kunene, 31, asebenzela esiteshini samaphoyisa e-Evaton, avele eNkantolo yeMantshi yaseSebokeng ehamba nomngani wawo, uHofney Morobe, 36. Laba bobathathu babhekene namacala okubulala iphoyisa uConstable Gift Mokoena, ukushaya ngenhloso yokulimaza, ukubamba inkunzi besebenzisa isihluku, ukwephula umthetho, kanye nokuphatha isibhamu bephuzile.

Kusolakala ukuthi ngobusuku bangomhla ziyi-16 kuNhlaba wezi-2021, la maphoyisa amabili ayengekho emsebenzini ahamba ngemoto endaweni yaseGolden Gardens noMorobe.

Babone imoto okusolakala ukuthi iyabandakanyeka esigamekweni sokugqekezwa kwendlu base beyilandela yaze yama egaraji likaphethiloli lakwa-BP eliseduze. Laba babhozomela abesilisa abane abebephakathi babashaya.

Ngemuva kwesigameko, bathathele omunye wabamangali umakhalekhukhwini nokhiye bemoto. UMorobe, ephelezelwa nguMatsoso noKunene, kuthiwa ushayele imoto yezisulu ngaphambi kokuzinikezela kumalungu eCommunity Policing Forum (CPF).

Kusolwa ukuthi ngalesi sikhathi uMorobe noMokoena owafika wabajoyina babehlangena namalungu omphakathi baqala ukushaya izisulu. Phakathi nalesi sigameko, uMorobe kusolakala ukuthi wasuka, wathatha isibhamu sikaMatsoso somsebenzi emotweni, wadubula uMokoena. UMokoena waphuthunyiswa esibhedlela esizimele iNkanyezi, eSebokeng lapho efike washonela khona. Abasolwa bazinikele esiteshini samaphoyisa eSebokeng mhlaka-30 Juni 2025.

Ngesikhathi kufakwa isicelo sebheyili, uMbuso awuzange ukuphikise ukukhululwa kwabo. Umshushisi uhambise incwadi efungelwe ngumphenyi, uWarrant Officer Nyongwana, eqinisekisa ukuthi abasolwa basebenzisane namaphoyisa, amakheli abo aqinisekisiwe kanye nokuzinikela kwabo ngokuzithandela. I-afidavithi iphinde yaveza ukuthi uphenyo seluphothuliwe nokuthi ofakazi bayimfihlo abammangalelwa ababazi.

La maphoyisa adedelwe ngebheyili kaR1000 engenayo imibandela. Icala lizobuyela enkantolo ngomhla ka4 Septhemba nonyaka.