UPHINDE wachithwa njengomholi wamaNazaretha uMnuz Mduduzi "Nyazilwezulu" Shembe wohlangothi lwaseBuhleni KwaShembe ngoMsombuluko yiNkantolo yokuDluliswa kwamaCala eBloemfontein.
Inkantolo ichithe isicelo sokudluliswa kwecala esasifakwe wuhlangothi lwaseBuhleni emuva kokuthi uMengameli wamaJaji KwaZulu-Natal, u-Achmat Jappie, akhipha isinqumo esivuna abaseThembezinhle.
Ngemuva kwesinqumo sikaJappie, abaseBuhleni baphinde balidlulisela eNkantolo eNkulu yaseMgungundlovu icala nayo eyakhipha isinqumo esihambisana nesikaJappie.
Emva kokuthi amajaji amabili aKwaZulu-Natal ekhiphe izinqumo ezihambisana nabaseThembezinhle, abaseBuhleni icala balidlulisela eNkantolo yokuDluliswa kwamaCala eBloemfontein nayo ebachithile izolo.
Isinqumo sejaji sango-2016 sakubeka kwacaca ukuthi phakathi koNyazilwezulu nomholi osakhothama, uVela "Imisebeyelanga" Shembe, umholi ofanele wuVela Shembe.
UMHOLI waseBuhleni uMnuz Mduduzi "Nyazilwezulu" Shembe ngoMsombuluko uphinde wachithwa yiNkantolo yokuDluliswa kwamaCala eBloemfontein. Isithombe: THOKAZANI NDLOVU
Emuva kokukhothama kweMisebeyelanga kwangena inkosi Phinda "Inkanyezi Yesithathu" Shembe esikhundleni sakhe.
Okhulumela uhlangothi lwaseBuhleni uMnuz Thokozani Mncwabe, uthe lesi sinqumo sizohlukanisa ibandla phakathi.
Uthe bazolinda uNyazilwezulu ukuthi luphume negama lokuthi bayaliqhuba yini leli cala nokuthi sekuzokwenzekani njengoba inkantolo iluchithile.
“Okwamanje sisalinde inkosi (uNyazilwezulu) ukuba iphawule ngalokhu nokuthi sekuzokwenziwani. Engingakusho nje wukuthi kuningi okusazokwenzeka ngenxa yalesi sinqumo, ibandla lizohlukana phakathi impela. Okubuhlungu kukhona abazalwane ababezitshela ukuthi icala selaphela kanti isinqumo sanamhlanje (izolo) yisona esibe wujuqu,” kusho uMncwabe.
Okhulumela abaseThembezinhle uMnuz Nkululeko Mthethwa, uthe njengoba sekuphume lesi sinqumo, bafuna luphume luphele uNyazi eBuhleni.
“Okokuqala nje uMduduzi Shembe akasayophinde ame phambi kwamakholwa njengomholi wamaNazaretha ngoba icala lilahle yena. Okusho ukuthi kusukela manje izinkumbi eziseBuhleni azisenaye umholi onguMduduzi kodwa umholi okhona uPhinda Shembe, ngokomthetho. Sifuna aphume aphele eBuhleni. Silindele incwadi yasenkantolo ezogunyaza ukuba sikwazi ukubuyela eBuhleni, njengoba singabakhona. Ibandla lilodwa manje, iphelile indaba yeThembezinhle neBuhleni. Umholi uyedwa. Lolu daba luphela lana ngoba ngeke lusaqhubeka kwenye inkantolo,” kusho uMthethwa.
Ummeli wohlangothi lwaseThembezinhle, uMnuz Trevor Nkosi izolo ekhuluma neSolezwe uthe lolu daba lufike emaphethelweni.
“Kusukela ngo-2011 kuthethwa leli cala, sigculisekile yisinqumo senkantolo esibeka uhlangothi lwaseThembezinhle njengolufanele wukuhola amaNazaretha. Emuva kokuchithwa kwalesi sicelo, mancane amathuba okuba siphinde sidluliswe lesi sinqumo ngoba kusukela ekuqaleni uhlangothi lwaseBuhleni aluzange luveze ukuthi umbango ugxambukela kuMthethosisekelo wezwe. Ukuzama manje ukuba luyiswe eNkantolo yoMthethosisekelo okungeyokugcina kuzoba lukhuni satshe,” kusho uNkosi.
Echaza ngokuthi sekuzokwenzakalani uthe kusazohlangana abameli basohlangothini lwaseThembezinhle bese kuxoxwa ngodaba oluthinta izimpahla zebandla okumele zibuyele kumholi ofanele.
Kuzokhumbuleka ukuthi ama-akhawunti ebandla, avalwa ukuba asetshenziswe njengoba bekuqhubeka umbango wobuholi.
Icala lombango wamaNazaretha liqale ngo-2011 emuva kokukhothama kwenkosi uVimbeni Shembe "uThingolwenkosazane" olwaluhola eBuhleni.
Lokhu kwadalwa wukumenyezelwa kwabaholi ababili ngosuku lokutshalwa koThingo okwaba uMduduzi noVela Shembe ongasekho.