ABANYE abaNtwana baseNdlunkulu kaZulu basola uNdunankulu kaZulu, inkosi Mangosuthu Buthelezi, ngokugxambukela nokuphehla udweshu ezindabeni zobukhosi.
Abafowabo beSilo esisandakukhothama, uZwelithini kaBhekuzulu, bathi uqhekeko olukhona endlunkulu ludalwa wuButhelezi.
AbaNtwana beSilo saKwaKhethomthandayo, uCyprian Bhekuzulu kaSolomon - uMbonisi, uVulindlela noMathuba- basola uButhelezi ngokuchapha amanye amalungu asendlunkulu ngenhlamba, ewabiza “ngemilanjwana”.
Le nkulumo kaButhelezi bona bathi bayihumusha ngokuthi unina obazalayo “ungunondindwa”.
Bathe sebelahle ithemba lokuthi kuyoke kube khona ukubuyisana phakathi kwabonoButhelezi.
Lokhu bakusho ngesikhathi bekhuluma esithangamini nabezindaba, izolo, lapho bebezocacisa ngezindaba ezithinta umbango wesihlalo sobukhos ibukaZulu namacala aqhubeka ezinkantolo.
UMntwana uVulindlela uthe uButhelezi udukisa isizwe uma ethi kuzokhishwa ihlambo likaMdlokombane ngempelasonto.
Uthe ihlambo likaMdlokombane kade lakhishwa, wathi kuphambene nosiko lwamaZulu ukukhipha ihlambo kuze kube kabili.
“Asazi, mhlawumbe yisiko elisha leli. Thina sazi ukuthi ihlambo lenzeka kanye. Thina salenza ngoba vele yithi okufanele silenze,” kusho yena.
UMntwana uVulindlela uthe wonke umuntu wasendlunkulu okubalwa neSilo uMisuzulu Sinqobile kaZwelithini, babazisiwe ngehlambo kepha kwakhona abakhetha ukungezi.
“Kwathiwa uMntwana uMisuzulu uphethwe wumkhuhlane ngalelo langa.”UMntwana uVulindlela uthe yena ngeke aze alubhade ekukhishweni kwehlambo okumenyezelwe ukuthi lizokhishelwa esigodlweni KwaKhangelamankengane.
Uphinde wasola uButhelezi ngokusebenzisa ulimi olulumelayo nokuphakaimpi.
“Esitatimendeni asikhiphile, uthe thina sidlala ngegeja kuziliwe. Kumina lolu wulimi olulumelayo futhi luphaka impi.”
Uthe uButhelezi usengene wagamangxa ezintweni zasendlunkulu.“Sicela ake athi ukusikhokhisa umoya. Nathi asikaze siye kobamba izimbuzi kwakhe ngesikhathi kushone umkakhe kodwa yena sambona ebambe imbuzi KwaKhangela.
“Wakwenza lokhu sikhona. Asazi ukuthi uyasingabaza yini ukuthisizalwa khona endlunkulu.”
UMntwana uMbonisi, naye ongumfowabo kaMdlokombane, uthe uButhelezi ukukhombise kaningi ukungayihloni phiindlunkulu.
Uthe uButhelezi akakhombisanga ukuhlonipha indlunkulu ngesikhathi embiza ngomlanjwana esidlangalaleni.
Uthe le nkulumo ingukwethuka iSilo esimzalayo, uBhush’ obukhali nonina.“Ngikhuluma njengendodana kaNyangayezizwe, uBhekuzulu, owathukwa ngokuthi umama wami ungunondidwa, uyis**, ngoba engasakwazi ukuziphendulela.
“Ukube uNkulunkulu usabagcinile ngabe bayaziphendulela. Akukwazi ukuthi uthi uyabuhlonipha ubukhosi kodwa uhambe uthuka ingane ezalwa khona ebukhosini.”
UMntwana uMbonisi uthe kababoni ukuthi kuyophinde kube khona ukubuyisana phakathi kwabo noButhelezi.
UMntwana uMbonisi uthe basamile ekutheni iSilo asikaqokwa. Usole uButhelezi ngokudukisa iSilo uMisuzulu ngokuthi asibize ngeSilo.
“ISilo asikwazi ukuqokwa kukhona amasiko angakagcinwa.”
Kuze kwashaya isikhathi sokushicilela ihhovisi likaButhelezi lingakayiphenduli imibuzo elithunyelelwe yona.