USEKWA nayiziMeya zomasipala abakhulu eGauteng umholi weDA KwaZulu-Natal, uMnuz Zwakele Mncwango (osesithombeni), iqembu lakhe elibheke engqungqutheleni yesifundazwe ezoba se-Olive Convention Centre, eThekwini, ngoFebhuwari 3.
IMeya yaseJohannesburg, uMnuz Herman Mashaba, neMeya yaseTshwane, uMnuz Solly Msimanga, ngoLwesibili baphumele obala ezinkundleni zokuxhumana baseka uMncwango ekutheni abuyiselwe esikhundleni sakhe.
UMashaba noMsimang bathi iDA ikhule kakhulu eKZN iholwa wuMncwango.
UMncwango ubanga isikhundla sokuhola iqembu eKZN noMnuz Emmanuel Mhlongo oyikhansela laseThekwini.
Oke waba yimbangi kaMncwango enkulu, uMnuz Sizwe Mchunu, akazange awungenele umbango.
Esikhundleni sikaSihlalo wenhlangano esifundazweni kubanga uMnuz Francois Rodgers noMnuz Dean Mcpherson.
UMncwango ukwamukele ukuphakanyiswa kwakhe.
Ilungu leDA esiShayamthetho KwaZulu-Natal, uMnuz Hlanganani Gumbi, ngoLwesibili uthe lifisa uMncwango ukuthi aqhubeke nokuhola iqembu esifundazweni.
UGumbi uthe iDA ikhulise ukwesekwa kwayo esifundazweni iholwa nguMncwango.
“Okokuqala emlandweni iDA inamakhansela uMkhanyakude wonke, namakhansela KwaNongoma nakwezinye izindawo zasekhaya. Konke lokhu sikuzuze ngoMncwango,” kusho uGumbi.
Uthe kumanje iDA ihola omasipala abaningi KwaZulu-Natal ngokubambisana ne-IFP. “Uma kusenoMncwango iDA izosuka ekubuseni ngokubambisana ne-IFP igcine sekuyiyona yodwa ebusayo,” kusho uGumbi.