OWAYENGUMELI wakuleli uMnuz Jacob Zuma uselaxazwe abameli bakhe ecaleni lenkohlakalo abhekene nalo obekulindeleke ukuthi liqale ukuqulwa ngenyanga ezayo.
Ngokwemibiko, abameli baZuma, iMabuza Attorneys, babhalele inkantolo eNkulu eMgungundlovu beyazisa ngokuhoxa ecaleni lenkohlakalao elibhekene noZuma nenkampani yezikhali yaseFrance, iThales.
Bamlaxaza nje icala lakhe lenkohlakalo lizoqala ngo Meyi 17, nokungenzeka ligcina selihlehliswa ngenxa yalokhu.
Ngokombiko weNews 24, uMnuz Eric Mabuza unqabile ukubeka isizathu sokuyeka ukuba ummeli kaZuma. Lokhu kuholele ekutheni ithimba lakhe lonke liyeke ukummela, okubalwa kulo no-Advocate Muzi Sikhakhane.
UZuma ulaxazwa abameli nje usanda kulahlwa yinkantolo edlulisa amacala ethe uZuma kwakungamele akhokhelwe izindleko zamacala akhe enkohlakalo.
Yathi kumele abuyisele imali enguR15.3 million wezindleko zamacala akhe enkohlakalo.
Bekungakacaci ukuthi uZuma usezomelwa ubani.
UZuma nenkampani yaseFrance yezikhali iThales, babhekene namacala enkohlakalo, ukukhwabanisa kanye nokushushumbisa imali ahlobene nesivumelwano senkontileka yezikhali