Abalibonanga elidlalayo abaseKZN kwesikamengameli wophiko lwabesifazane lwe-ANC
Abalibonanga elidlalayo abaseKZN kwesikamengameli wophiko lwabesifazane lwe-ANC
BAKHALE ngaphansi abaholi ababili baKwaZulu-Natal kwesikamengameli wophiko lwabesifazane lwe-ANC, uNksz Bathabile Dlamini, owayengumengameli walolu phiko, noNkk Thembeka Mchunu, abahlulwe nguNksz Sisisi Tolashe onguNgqongqoshe eHhovisi likaMengameli obhekele abesifazane, intsha, izingane nabaphila nokukhubazeka.
UNksz Tolashe wase-Eastern Cape uthole amavoti angu-1 729, kwalandela uNkk Mchunu ngamavoti angu-1 038 kwathi uNksz Dlamini wathola kuphela angu-170.
UNksz Dlamini ubefuna ukukhuza ibuya kulesi sikhundla ayesiphethe ngaphambi kokuhlakazwa kwalolu phiko kwafakwa ithimba lesikhashana obeluphethwe nguNksz Baleka Mbete.
UNksz Tolashe ubeyimfivilithi njengoba ayephakanyiswe amagatsha amaningi ngesikhathi kuyiwa kule ngqungquthela ebiseNasrec, eGoli, eqale ngoLwesihlanu yasongwa izolo ebusuku.
UNksz Tolashe uzosebenza noNksz Lungi Gcabashe waseKZN, kwesephini likamengameli othole amavoti angu-1 661, uNksz Bernice Swarts wathola amavoti angu-1 190, kwathi uNksz Sylvia Elizabeth Lucas, iphini likasihlalo womkhandlu wezifundazwe ePhalamende, wathola angu-62.
Kwesikanobhala jikelele kukhethwe uNksz Nokuthula Nqaba ngamavoti angu-1 611, kwathi uNkk Lydia Maroane-Zitha wathola angu-1 081.
Kwesephini likanobhala jikelele ukhuze ibuya owayengungqongqoshe wezokuxhumana ngaphansi kukamengameli Jacob Zuma, uNksz Dina Pule, ngamavoti angu-1 713, ehlula uNksz Makoma Makhurupetje ngamavoti angu-1 035.
UNksz Pule waxoshwa emva kokuba ikomiti lasePhalamende lamthola ukuthi waphula imigomo ethinta le ndlu emva kophenyo lowayengumvikeli womphakathi.
Kwesomgcinimafa, kukhethwe uNkk Maqueen Letsoha-Mathae ngamavoti angu-2 608, ehlula uNksz Manketsi Thlape ngamavoti angu-281.
Le ngqungquthela iqale ngemuva kwesikhathi kulandela ukubambezeleka kwayo ngoba amanye amalungu abesabhalisa.
Izolo ebusuku emva kokumenyezelwa kwabaholi balolu phiko bekusazoqala uhlelo lokuphakamisa amagama abazoba amalungu engeziwe.
Bekuzovotelwa lawa malungu bese kumenyezelwa amagama alabo abaphumelele noma babuye bamenyezelwe ngelinye ilanga.