USimamane ugadle ngengoma kuSol Phenduka

ISIHLOKO: G-Wagon Music: Baby Tai

UMREPHA: Usimamane

UHLOBO: Hip Hop/Rap

UMHLAZIYI: CHARLES KHUZWAYO

UMA kungukuthi wawuzitshela ukuthi ucilo wathuka uzishaya endukwini ku-Omuhlemnguni Mxolisi Simamane ngesikhathi ekhipha umucu owashisa izikhotha waze wahlabana ngama-Platinum amathathu ngo-2024, osihloko sithi Cheque, ushaye phansi kwashunqa uthuli.

USimamane uyakhombisa ukuthi ingoma ethi Uvalo ayithandwanga ngabantu ngenxa yokuthi upike uSjava. Ngaleli cwecwe eliphume ngoMsombuluko akasinisi amahleza. Amathe abuyele kasifuba kwebebezitshela ukuthi usephelelwe wushatini.

Leli cwecwe liphume emuva kokulangazelelwa ngabathandi bomculo we-hip hop ne-rap. Obekwenza lokho wukuthi besilokhu sigabiselwa ngamanoni akulo ezinkundleni zokuxhumana.    Le-EP iqukethe izingoma eziyisithupha.

Engikuphawulile wukuthi uziphendulele kuSol Phenduka noThagki bePodcast and Chill Network. Ngimkhumbula kahle uSol ethi umculi okunehaba ngaye uSimamane. Wayebuzwa wuDudu kwiPodcast and Chill with MacG.

Vele umculo we-hip hop umnandi ngakho ukungcofana. Ubagudla ngengoma ethi Tai Lung's Pain. Angazi ugudla bani ngengoma ethi Nix. Engikuthanda kakhulu ngaye wukuthi akanqeni ukukutshela ukuthi yena uyinhlalisuthi ezikhonzela kwaShembe futhi uzidabukela eMlaza. Singichazile isigingci sikagesi esinkeneneza engomeni ethi Done Done. Ngeke wayithakasela uma ungasiye umuntu okhonze i-hip hop. Ngakho ngimthulela isigqoko umdidiyeli waleli culo. Ngengoma ethi Racks, ugqugquzela abantu ukuthi uma bedinga imali, abangabi ngovilavoco.

Uyilahle ngenhlamba kungenasidingo. Ukuthi nangalemali ugudla bani, angazi. Singichazile isigingci engomeni ethi Umusa Wakho Outro.

Usuke ebonga uNkulunkulu ngamenzele khona. Uma ungumlandeli womculo kaSimamane, uzobhema ukholwe.