Igidangoma laseShowe liyomela elakuleli e-Ivory Coast

UMDLALI wemidlalo yethelevishini waseShowe,uQagela Lindokuhle Nxumalo, uyomela iNingizimu Afrika emcimbini osedolobheni lase-Ivory Coast, iKouto ngenyanga ezayo.

UQagela (23) uthe uzofulathela leli kusukela ngoFebhuwari 3 aze abuye ngomhla ka-10. "Sizobe sihamba noSpikili Mnotho Dladla, Sokalentombi Sandile Dlomo, Malebuli umfo kaShange, Khanyi Shange neqembu lezintokazi elibizwa ngoSwenkabamabhinca."

Uthe bazobe bewu-20, kungabesifazane abawu-15 nabesilisa abahlanu.

"Sizobe sinandisa kusukela ngomhla ka-5 kuze kushaye umhla ka-7," kusho le nsizwa esibuya kolingisa kuMkhokha The Curse, Amalanga Awafani, Sibongile And The Dlaminis, Isandlwana The Musical nakwiTales Of A Zulu Dancer/Igidangoma.

UQagela udabuka eVuma eShowe futhi ufunde eNsukazi Primary, eYamela High kodwa waphothula uGrade 12 eSibonelo Secondary KwaMashu. Ngaphandle kokulingisa uQagela ubuye abe yigidangoma emaqenjini kayise oyigoso nomculi kamaskandi, uGadla Nxumalo.