Unqunyelwe ugwayi katiki uMphathiswa wezokuThuthukiswa koMphakathi

SELIPHINDE lembula ingubo langena kuMphathiswa wezokuThuthukiswa koMphakathi, uNksz Mbali Shinga, onqunyelwe ugwayi katiki yiqembu elimjube esiShayamthetho.

I-NFP ifuna uNksz Shinga achaze ukuthi kungani eshaye indiva umyalelo weqembu wokuba aseke isiphakamiso sokungabethembi ubuholi bukaNdunankulu waKwaZulu-Natal, uMnuz Thami Ntuli?

Lo myalelo uqukethwe encwadini eshubile ebhalelwe uNksz Shinga.

Kule ncwadi ebonwe yiSolezwe, uNksz Shinga uyalelwe ukuba achaze ukuthi kungani kungafanele athathelwe izinyathelo?

Incwadi eqhamuka kuNobhala Jikelele weNFP obambile, uMnuz Sunset Xaba, ibinike uNksz Shinga umnqamulajuqu wayizolo ukuba alethe impendulo.

UNksz Shinga washabalalisa onke amathemba eMK okukhipha uNtuli esikhundleni ngesikhathi ezwakalisa ukuthi ngeke aseseke isiphakamiso sayo.

I-MK yayidinga okungenani isihlalo esisodwa ukuze ikwazi ukunqoba esiphakamisweni sayo esasilalelwe esiShayamthetho ngoMsombuluko.

Ngaphambi komhlangano, umholi weNFP, uMnuz Ivan Barnes, wayekade ethe bazoseseka isiphakamiso sokungabethembi ubuholi bukaNtuli.

UXaba uveze ukuthi kwabizwa umhlangano wesigungu esiphezulu ophuthumayo emva  kwengwijikhwebu eyashaywa nguNksz Shinga ngesikhathi esho okuphambene nomyalelo weqembu.

"Emhlanganweni wesigungu esiphezulu sinqume ukuba sikuyalele ukuba ulethe umbiko ogcwele ngalokhu owakusho ngesikhathi kunempikiswano ngesiphakamiso sokungabethembi ubuholi bukaNtuli, kulo mbiko sifuna usilethele nenkulumo owayethulayo."

"Uyalelwa ukuba ulethe omunye umbiko ogcwele lapho uzoziphendulela khona ezinsolweni zokushaya indiva umyalelo weqembu, uphinde futhi achaze ukuthi kungani kungafanele uthathelwe izinyathelo ngokwesigaba 3.5.1.2 somthetho weqembu? Ngalokhu sifisa ukuvikela isithunzi seqembu, siqinisekise ukuhlonishwa kwemigomo yeqembu, siphinde senze isiqiniseko sokuthi bonke abajutshwe ezikhundleni bayayihlonipha imiyalelo yeqembu."

Imizamo yokuthola ukuphawula kukaNksz Shinga ayizange iphumelele.

Ithimba likaNksz Shinga libanqabelile abezindaba ukuba babuze ngalolu daba ngesikhathi eyovula isikhungo sabahlukunyezwa udlame lwezobulili eThekwini, izolo.

Akukhona okokuqala uNksz Shinga ethathelwa izinyathelo yiqembu lakhe.

NgoJuni nonyaka, iNFP ike yazama ukumkhipha esikhundleni nasekumeleni iqemu esiShayamthetho kodwa yangaphumelela.

Ike yazama nokumthathela izinyathelo zokuqondiswa ubugwegwe kodwa yavinjwa yisinqumo senkantolo.