Iyolala ibonene esiphakamisweni sokuketula uNtuli

AKWAZIWA ukuthi kuzogcina bani esiphakamisweni sokungabethembi ubuholi bukaNdunankulu waKwaZulu-Natal, uMnuz Thami Ntuli, esifakwe yiMK Party eholwa owayengumengameli, uMnuz Jacob Zuma.

Kuzophela amaphupho uma amalungu esiShayamthetho esevotela isiphakamiso sokungabethembi ubuholi bukaNtuli, namhlanje.

Akwaziwa mbhantshi kujiya njengoba umehluko phakathi kwamaqembu aseka isiphakamiso seMK nalawo asiphikisayo umncane kakhulu.

I-MK inezihlalo ezingu-37 kwezingu-80 esiShayamthetho, isiphakamiso sayo sesekwa yiqembu elinezihlalo ezimbili, i-EFF.

Amaqembu asephumele obala aveza ukuthi azophikisa isiphakamiso seMK yi-IFP, ANC ne-DA, anezihlalo ezingu-40 uma ehlangene.

Akucaci ukuthi iqembu elingababeki benkosi, iNFP, ukuthi lizovota kanjani lona.

Ubuholi beNFP kuzwelonke buyaseseka isiphakamiso seMK kanti ubuholi beqembu KwaZulu-Natal buyaphikisana nesiphakamiso.

Umhlaziyi wezepolitiki waseNyuvesi yaKwaZulu-Natal, uMnuz Zakhele Ndlovu, uthe konke kuzoncika ekutheni iNFP ivota kanjani.

"Sonke siyazi ukuthi umholi weNFP (uMnuz Ivan Barnes) uyaseseka isiphakamiso sokungabethembi ubuholi bukaNtuli kodwa ilungu leNFP elijutshwe esiShayamthetho (uNksz Mbali Shinga) aliseseki isiphakamiso sokungabethembi ubuholi bukaNtuli. Asazi ukuthi uNksz Shinga uzogcina evote kanjani."

I-MK yayikade icele kuSomlomo, uNksz Nontembeko Boyce, ukuba kuvotwe ngokuyimfihlo.

UNdlovu uthe kungenzeka noma yini uma uNksz Boyce engase avume ukuba kuvotwe ngokuyimfihlo.

"Kungenzeka kube khona amalungu e-ANC azovotela isiphakamiso seMK. Uma kuvotwa ngokuyimfihlo kuba nzima ukuphoqa amalungu ukuba alandele umyalelo weqembu."

UNdlovu uthe kungase kuphoqe ukuba kuqalwe phansi ukhetho KwaZulu-Natal uma iNFP ingase ivote neMK.

"Lokho kuzokusho ukuthi bangu-40 abeseka isiphakamiso seMK, babe ngu-40 abangaseseki. Lokhu kuzokwenza ukuthi uhulumeni wesifundazwe ungakwazi ukusebenza kahle."

Kulindeleke ukuthi impi yabafuna kukhishwe uNtuli nabamesekayo inqwamane ngaphakathi kanye nangaphandle kwesiShayamthetho.

Amalungu eMK nawe-IFP azoqhudelana ngemibhikisho ezobanjelwa ngaphandle kwesiShayamthetho.

I-DA nayo izokuba nawayo umbhikisho bude buduze nesiShayamthetho, e-Alexandra Park, lapho izozwakalisa ukuphikisana kwayo nesiphakamiso seMK.

I-MK ifake isiphakamiso isola uNtuli ngokwehluleka ukuthathela izinyathelo abaphathiswa abasoleka enkohlakalweni.

I-MK inxenxe amalungu ayo ukuba aphume ngobuningi bayo azokweseka isiphakamiso sokungabethembi ubuholi bukaNtuli.

Umholi wophiko lwentsha kwi-MK, uMnuz Qiniso Cibane, uthe bafuna ukuthi lishone elanamhlanje iKwaZulu-Natal isiphethwe yiMK.

"Abantu baKwaZulu-Natal bavotela ngobuningi iMK ngoba befuna kube iyona ebaphathayo, ayi lo hulumeni kaNtuli."

Umholi wenhlangano edlelana neMK, iMK Labour and Civic Organization (MK Laco), uMlungisi Zondi, uthe iKwaZulu-Natal kufanele engabe iphethwe yiMK.

"Asiphume sonke siyolwela iKwaZulu-Natal. Njengoba abantu abaningi KwaZulu-Natal bavotela iMK, kusho ukuthi iyona okufanele iphathe."

Isiphakamiso seMK siyinyathele emsileni i-IFP, abaholi be-IFP besihlaba basihlikiza isiphakamiso sanamhlanje.

USihlalo we-IFP kuzwelonke, uMnuz Blessed Gwala, uqhamuke nesiqubo esithi "Sigulelwa uMkhonto, uMkhonto udinga udokotela".

Umholi we-IFP, uMnuz Velenkosi Hlabisa, uthe kuzophazamiseka umsebenzi omuhle owenziwa uhulumeni ophethe uma singase siphumelele isiphakamiso seMK.

"Inhloso yabo ukubuyisela emumva isifundazwe iKwaZulu-Natal. Kusukela ngokhetho lwangonyaka owedlule uhulumeni waKwaZulu-Natal oholwa i-IFP usuwenze umehluko omkhulu. Sinxusa onke amaqembu ezombuswazwe afuna ukubona inqubekela phambili ukuba aphikise isiphakamiso sokungabethembi ubuholi bukaNtuli."

UNtuli uzichithile izinsolo ezibekwa yiMK, wathi kusukela kwasekuqaleni vele iMK ne-EFF ayikaze ikwamukele ukuqokwa kwakhe, wathi mhla eqokwa iMK ne-EFF bavotela umholi weMK esiShayamthetho, iNkosi Phathisizwe Chiliza, ayebanga naye.

"Ngesikhathi ngiqokwa bathi lo hulumeni wokubambisana ngeke uziqede izinyanga ezintathu. Emva kwalokho, bathi angeke uwuqede unyaka ngakho-ke akuthusi lokhu abakwenzayo."

UNtuli uthe maningi amathuba emisebenzi adalekile kusukela angena esikhundleni, wathi ziningi nezinhlelo zokulwa nobugebengu aqhamuke nazo.