Abasafufusa banikwe 'ukhiye wokuchuma' kwezamabhizinisi

"UKULANDELA yonke imithetho nemigomo okumqoka ekwengameleni ibhizinisi akuyona into yosomabhizinisi asebechumile nabaziwayo kuphela, kepha kuyinto emqoka nokudingeka ukuthi lowo nalowo somabhizinisi ayiqikelele ukuze asimame."

Usho njalo uMnuz Vijay Naidoo, obengesinye sezikhulumi zosuku kwi-The Next Billionaire Business Expo, umbuthano obuhlanganise osomabhizinisi bemikhakha ehlukene obusoGwini Indoor Sports Centre, eGamalakhe, ngoLwesine.

Umbuthano, obuqala ukwenziwa nonyaka uyisendlalelo somcimbi wokuklomelisa osomabhizinisi abenze kahle emabhizinisini abo ahlukene ozoba namhlanje iThe Next Billionaire Business Awards, ozoba khona oGwini Sports & Leisure Centre.

UNaidoo uthe okwenza akhulume kanjena wukuthi ohambweni lwakhe kwezamabhizinisi useqaphele ukuthi osomabhizinisi abasafufusa abakukhuthaleli ukulandela nokugcina imigomo elawula ukusebenza kwamabhizinisi abo, okubanqinda ukuqhubekela phambili ngawo.

"Yingakho namhlanje (esho izolo) sikhuthaza bonke osomabhizinisi ukuthi baqikelele ukuthi amabhizinisi abo anesisekelo esiqinile sokulandela nokugcina yonke imithetho elawula futhi igunyaze ukusebenza kwamabhizinisi abo, okuzosiza ukuthi kwenze bathembeke ezinhlakeni ezahlukene, kubalwa nabatshalimali abazosebenzisana nabo ukukhulisa amabhizinisi abo.

"Ngakho uma nizoziba imithetho yokubhalisa ibhizinisi nokunye okweyamene nalokho, nizobe nifana nabantu abazigwaza ngowabo. Lokho kusho ukuthi nizophuthwa yinqwaba yamathuba abenganisiza ukuqhubekela phambili, kepha eningeke nawathola nhlobo ngoba akekho umuntu ongakhuthalela ukutshala imali yakhe entweni engathembekile," usho kanje.

Omunye futhi wezikhulumi zosuku, uMqondisi woPhiko lwezokuSebenza eMnyangweni wokuThuthukisa uMnotho, ezokuVakasha nokoNgiwa kweMvelo uMnuz Nhlanhla Mpondi, uthe okubahlabe umxhwele nokwenze basukumela phezulu yizibalo ezishaqisayo zosomabhizinisi abasala endleleni emabhizinisini abo.

"Ocwaningweni lwethu lwezamabhizinisi sithole ukuthi osomabhizinisi abaningi bayehluleka ukwedlula onyakeni ka-10 besebhizinisini. Lokhu kuyasikhathaza kakhulu ngoba kusho ukuthi kukhona okungahambi kahle. Yingakho sisukumele phezulu ukweseka umbono onjena, ngoba sihlose ukubamba iqhaza ekutheni osomabhizinisi abasafufusa bathuthuke. Siyazi ukuthi bawumgogodla wokusimama komnotho, futhi basiza ngokuqeda indlala yamathuba omsebenzi emiphakathini," kusho uMpondi.

Ezinye izikhulumi ezicobelele izethameli ngolwazi oMnuz Thabani Dube weTakealot Group, Sifiso Zulu onamava kwezobuchwepheshe besimanje, kube wuNksz Zama Mkhize onolwazi kwezokumaketha neMeya yakuMasipala waseRay Nkonyeni iKhansela uZodwa Mzindle. 

Osomabhizinisi abebekulo mbuthano bathole nethuba lokubuza imibuzo ngokubashisayo, base becaciselwa ngokuningi okumele bakwenze kusuka manje emabhizinisi abo. 

UNksz Lungile Mbili, umsunguli wenkampani ehlela imicimbi Umlando Creatives - okuyiyona futhi ebihlele umcimbi, uthe kubajabulisile ukubona osomabhizinisi basoGwini namaphethelo bephuma ngobuningi babo ukuzothekela ulwazi kulo mcimbi.

"Besilindele ukuthi kube khona osomabhizinisi abawu-50, kepha kwagcina kufike abawu-78 okusho ukuthi abantu balulambele kakhulu ulwazi ababezocotshelelwa ngalo lana, ngakho sithemba ukuthi bazolusebenzisa ngendlela efanele ukuzithuthukisa namabhizinisi abo," usho kanje.

Ugcizelele nokuthi konke sekumi ngomumo ngomcimbi wanamhlanje wokuklomelisa osomabhizinisi emikhakheni ewu-20 ehlukene yezamabhizinisi, ozobe wenziwe okwesithupha nonyaka ngenhloso yokubakhuthaza baqhubeke nemisebenzi yabo emihle.