Ifakelwa izibuko eyezikhalo ngokuqina kwamaphepha eMaths kwa-matric

UMNYANGO wezeMfundo eyisiSekelo usuqinisekise abafundi nabazali ukuthi amaphepha ka-matric asethwa ngendlela elandela imigomo ebekiwe ohlelweni lokufunda nokufundisa.

Umnyango uthe wonke amaphepha asuke equkethe izinto ezifundiwe nezithinta ukuphendula imibuzo edinga isisombululo.

Lokhu kuvezwe nguMnuz Terence Khala, wezokuxhumana emnyangweni kulandela izikhalazo  zokuthi amaphepha eMathematics abhalwe ezivivinyweni zika-matric, abenzima.

"Kunezikhalo emphakathini zokuthi iphepha lokuqala nelesibili abhalwe kulo nyaka kwa-matric leMaths, abenzima. Sifisa ukwazisa abafundi nabazali ukuthi amaphepha asethwa kufakwa izinto ezifundiwe," usho kanje.

Uthe uma umkhandlu oqinisekisa izingabunjalo lika-matric, Umalusi, usuwenza uhlelo lokubheka zonke izifundo ezibhaliwe ukuthi bezisezingeni elifanele, uyazibheka izinto ezifuze lezi okukhalwa ngazo.

"Uma kungukuthi bukhona ubuqiniso bokuthi iphepha belinzima kunalokhu obekulindelekile, uhlelo luka-Umalusi luqinisekisa ukuthi akekho umfundi ozoba yisisulu ngenxa yobunzima bephepha. Ngaso sonke isikhathi abafundi babekwa phambili," kusho uKhala.

Isolezwe lithole ukuthi wonke amaphepha asebhaliwe, ayacutshungulwa amathimba ongoti emnyangweni kazwelonke.

Lokhu kufaka amaphepha abenzima nalawo okuthiwa abelula kanti kuqhathaniswa nalawo abhalwe ngonyaka odlule.

UKhala uveze ukuthi azikho izigameko ezinkulu ezibikiwe eziphazamise izivivinyo selokhu ziqalile.

"Zimbalwa izehlakalo ezibikiwe nakuba sekubhalwe cishe uhhafu wezivivinyo kwa-matric. Kuba nokungenela ngokushesha kuxazululwe izinkinga uma kwenzeka kuqubuka okubonakala sengathi kungaphazamisa izivivinyo." 

Uthe abafundi abevile ku-920 000 bayaqhubeka nokubhala ezikhungweni ezibalelwa ku-6 800.

"Abagada uma kubhalwa kanjalo nothisha bazimisele kakhulu ekutheni lezi zivivinyo zibe yimpumelelo kuzona zonke izifundazwe. Sisalokhu sihlabe ikhwelo emiphakathini ukuthi iqinisekise ukungaphazamiseki ukubhalwa kwalezi zivivinyo."

Ululeke abafundi ngokuthi baphumule ngokwanele, badle ngendlela baphinde bahlabe ikhefu uma befunda.

"Lokhu kuzobasiza ukuthi bangazigxishi ngomsebenzi baze bakhathale kanti sebezofika kuMaliyethe. Sinethemba ukuthi lezi zivivinyo zizophothulwa ngaphandle kwezingqinamba."