'Awaphume ibhodwe lawo amaKhatholika anengwa ngeyokuchithwa kwamadlozi'

MABAQALE elabo ibandla oFata nabazalwane abanganeme ngesinqumo sokuchizelwa kwamadlozi ebandleni eliKhatholika.

Lona ngumbono kaSolwazi VVO Mkhize obephawula ngesinqumo sakamuva sobuholi obuphezulu baleli bandla sokumisa ukuhlatshelwa kwamadlozi.

Lesi sinqumo kuvela ukuthi sisuse umsindo omkhulu kuleli bandla ohambisana nentukuthelo kwabaningi abasichithayo.

USolwazi Mkhize uthe uma singabuyekezwa lesi sinqumo ayikho enye into, kumele baphume baqale okwabo okuzovumela ukuhlatshelwa kwamadlozi abafundisi abangahambiselani nalokhu.

Ngokusho kwakhe, uma befinyelela kulesi sinqumo akekho oyobasola ngokwenza kanjalo.

"Nalo ibandla abazoliqala lingaphumelela. Kuzobe kungaqali ngabo ukuphuma eKhatholika ebese beqala ibandla. Lokhu kade kwasa kwenzeka kuleli bandla," usho kanjena.

Eqhuba, uthe yena ukhulele kuleli bandla - uyakweshwama lokhu akuzwile. Uthe uyazibuza uyaziphendula ukuthi kufinyelelwe kanjani kulesi sinqumo?

Usole abefundisi abamnyama baleli bandla ngokuba yizincelebane zabamhlophe. Uthe kumdumazile ukuthi isinqumo esinzima kangaka kungathiwa sithathwe ngokuvumelana kwababhishobhi abamnyama.

"Uma kunjalo bazolahlwa ngamathongo emindeni yabo bonke abaholi abamnyama abavumelane nalesi sinqumo," usho kanjena.

Uthe uma kuwuPhapha ofike nalesi sinqumo kwayena unephutha.

"IBhayibheli lithi hlonipha uyihlo nonyoko. Lona ngumyalelo omqoka kakhulu eBhayibhelini. Kumele sibahloniphe besadla anhlamvana noma sebeshonile," echaza.

Uthe wonke umuntu onomzali osalala kobandayo, loyo muntu unedlozi. Ugcizelele ukuthi uyafisa ukubona ukuthi iyozala nkomoni ngalesi sinqumo sebandla.

Udalule ukuthi baningi oFata baleli bandla abaye bafike esigodlweni sakhe eMlambomunye bezofuna usizo. Kuthiwa abanye bathwase khona ukuba yizangoma