Kuzohlephuka imbadada emcimbini woMakhedama

KUZOGUGA imbadada kwiMakhedama Maskandi Show & Imvunulo Competition ezinkundleni zemidlalo zaseBayempini, eSpringvale, eXobho ngoMgqibelo kusukela ngo-10 ekuseni.

Kulo mcimbi kuzobe kudlana imilala amaqembu engoma, ebanga umklomelo wemvunulo. Izithameli zizobuye zizitike ngomculo ozobe uqhululwa ngabaculi abadumile okubalwa kubo Ithwasa Lekhansela, Bahubhe, Ichwane Lebhaca, Solwazi, Nyonemhlophe, Abagqobhi, Uphondo Lukabhejane, Skebhebaketule, Mkhanyakude, Sbhomane, Bagqilaze, Abaqondisi, UDumethula, Mthulisi, Nhlakanipho neNkephu.

Umgqugquzeli walo mcimbi, uMuzikawupheli Mhlongo woMakhedama, uthe balindele izinkumbi zabantu ukuba zihambele leli dili likaMkhipheni. OMakhedama iqembu likamaskandi elasungulwa wuMuzikawupheli ngo-2017. Kusukela ngalowo nyaka, Omakhedama bahlabane ngendondo emqhudelwaneni owawenziwa nguMasipala Ubuhlebezwe.

"Sakhipha i-albhamu esihloko sithi Ngeke Bayimele. Lelo cwecwe lalinezingoma eziyisihumi, ebeziculwa wuMnelisi, uMuzikawupheli noNomzamo, okuyibo abebelekelelana uma bezokhipha umsebenzi."

Kwaphinda ngo-2019, bakhipha i-EP ebinezingoma ezintathu. Kwathi ngonyaka owedlule bakhipha enye i-EP nayo ayeyinezingoma ezintathu.

"Njengamanje silungiselela ukubuyela e-studio siyokwenza umsebenzi omusha."

KwiMakhedama Maskandi Show & Imvunulo Competition kuzobe kungenwa ngo-R30.