I-ANC ichitha ubulungu bukaBrown Mogotsi

I-African National Congress (ANC) iphawule ngezinsolo zakamuva zokuthi kukhona abathile kule nhlangano, okubalwa noMnuz Oupa Brown Mogotsi, abasolwa ngokuthinteka ebugebengwini obuhleliwe. Unobhala jikelele we-ANC uMnuz Fikile Mbalula ukhiphe isitatimende esiveza ukuthi ubulungu bukaMogotsi kule nhlangano kade baphelelwa yisikhathi.

"Amarekhodi ethu obulungu ayaqinisekisa ukuthi ubulungu bukaMnuz Mogotsi ku-ANC buphelelwe yisikhathi. Sesingakuqinisekisa manje ukuthi uMnuz Mogotsi akalona-ke ilungu le-ANC."

Indida ngalesi sitatimende wukuthi asichazi ukuthi baphela nini ubulungu buka-Mogotsi kule nhlangano nokuthi wayengekho na ezinhlelweni zokubuvuselela.