Bekusindwe ngobethole emgcagcweni wenkosi
YINGXENYE yezitatanyiswa ebezihambele umgcagco weNkosi yakwaMpungose, uZakhe noNdlunkulu uThabsile uMaGoqo, esigodini saKwaZikhali, eNkandla. Kwesokunxele uMntwana uNkinobho Zulu, uNdunankulu uMnuz Thami Ntuli, uMdidiyeli wamabutho uMnuz Sipho Mhlongo nomculi uKhuzani Mpungose
Image: ZAMANI MATHE
BEKUFINYWA ngendololwane emgcagcweni weNkosi yesizwe sakwaMpungose, uZakhe Mpungose eNkandla, ngempelasonto. Inkosi beyishadelwa yintokazi yaseMangidini, eNkandla, uThabsile wakwaGoqo.
Le ndumezulu yomshado iqale ezinkundleni zemidlalo zaseNkandla, ngoLwesihlanu, yaze yaphothulwa ekomkhulu lwenkosi esigodini saKwaZikhali, ngoMgqibelo. Umshado omhlophe bewuhanjelwe nguNdunankulu waKwaZulu-Natal, uMnuz Thami Ntuli, iNkosi yaKwaPhindangene uMntwana uZuzifa Buthelezi, uSotswebhu we-IFP kwisiShayamthetho sakulesi sifundazwe, uMnuz Blessed Gwala, usonkondlo uKwazi Nsele, umsunguli weMpucuzeko Maskandi Festival, uXolani Mcineka, umculi kamaskandi uKhuzani Mpungose, umculi wokholo uJumbo, amakhosi aseNdlunkulu kaZulu, izimeya, izinduna namakhansela.
Ngalolu suku, iNkosi uMpungose imangazwe yisizwe sayo ngesipho sonyanyavu lweveni eyi-double cab. Ngakusasa ngoMgqibelo, kutheleke uNtuli, uMphathiswa wezokuBusa ngokuBambisana neziNdaba zaboMdabu eKZN, uMfu Thulasizwe Buthelezi, uKhuzani namakhosi nezinduna zezizwe ezihlukene.
Izithameli bezivunule ziconsa. Amabutho abetheleka ethelekile ngamabhasi. Emuva komabo, kube sekunandisa uSamkelo Shezi wodumo kwiTikTok, Q Twins, Falabo Khuzwayo, Mabhilidi noNjoko. Izithameli nezitatanyiswa bezifinya ngendololwane ngenxa yezinkomo ezingaphezu kuka-10 ebezigingqiwe futhi neziphuzo zingangamanzi okuphala izikhumba.
INkosi uMpungose ithe iyaqala ngqa ukusiniselwa kodwa ayinaso isiqiniseko sokuthi igcinile. Ithe kuzoya ngokuthi iyawathola yini amandla okuthatha omunye undlunkulu.
Inkosi noMaGoqo babusiswe ngamasu amathathu, okungamantombazane amabili aphilayo neyodwa eyadlula emhlabeni.
INKOSI uZakhe Mpungose ihalaliselwa nguMphathiswa uMfu Thulasizwe Buthelezi
Image: FACEBOOK
INJABULO beyibhalwe ebusweni kwiNkosi uZakhe Mpungose noNdlunkulu uThabsile uMaGoqo ngesikhathi begcagca phambi kwezinkumbi zabantu
Image: ZAMANI MATHE
INKOSI uZakhe Mpungose ikakwe ngamabutho, ngosaziwayo nabaNtwana baseNdlunkulu kaZulu
Image: ZAMANI MATHE