Itwetwe kwanda isibalo sokwebiwa kwezimoto zoMkhandlu weTheku
IMEYA kamasipala weTheku uMnuz Cyril Xaba
Image: SITHUNYELWE
IMEYA yeTheku, uMNuz Cyril Xaba isiphumele obala yezwakalisa ukuthi kukhona okumele kwenziwe ngenhloso yokubhekana ngqo nesihlava esigubuzele leli dolobha sokwebiwa kwezimoto zomkhandlu.
UXaba uthi seyithanda ukuba yinsakavukela inkinga yokwebiwa kwezimoto zomkhandlu. Uthe okuyinkinga ukuthi abagcini nje ngokuzeba baphinde bahlasele nabasebenzi bomkhandlu abasuke bejutshwe ukuyisa intuthuko emphakathini.
Usephosele inselelo izikhulu eziphezulu ukuba zibhukule kube khona ezikwenzayo ngenhloso yokubhekana nale ngwadla. IMeya ithe lesi simo siwuhlalise lubhojozi umasipala weTheku.
Iqhuba iMeya ithe ifuna kube nombiko ogcwele oveza ngokusobala ukuthi zingaki izimoto zomkhandlu esezebiwe.
Ilanda ithe lo mbiko kumele uveze ukuthi kwenzeke ezimotweni ezingaki kule minyaka emithathu eyedlule. Igcizelele yathi lo mbiko kumele uveze nokuthi zibe ngaki izigameko zokusatshiswa nokuhlaselwa kwabasebenzi bomkhandlu.
Lo mbiko ithe kuzobhungwa kabanzi ngawo kwi-EXCO kuphinde kuqhamuke nesisombululo sale ngwadla.Ithe bakhathazekile kakhulu ngalesi simo ngoba sigcina sesinomthelela okhinyabeza ukuhanjiswa kwezidingo emphakathini.
''Sikhathazekile kakhulu ngale nkinga esizithola sibhekene nayo njengomasipala weTheku. Lokhu kuletha itwetwe elikhulu kubasebenzi bakamasipala weTheku ezisekhaleni lokuhanjiswa kwentuthuko kubantu,'' isho kanjena.
Lezi zigameko ithe ziyabakhathaza kakhulu ngoba kwesinye isikhathi zisuke zihambiselana nokulimala kwabasebenzi bomkhamdlu weTheku.
Ithe ngenhloso yokuzama ukubhekana nale ngwadla amaphoyisa alo mkhandlu azohloma abe yizingovolo abese ebheka kakhulu lezo zindawo okubonakala kuyizona okwenzeka kakhulu lezi zigameko.
IMeya ibe seyigcizelela ukubaluleka okukhulu kokusebenzisana phakathi kukamasipala weTheku kanye namalungu omphakathi.
Kukhuzwa inkinga yokwebiwa kwezimoto kuke kwaba nenkinga yokwebiwa kukadizili nayo ebidla lubi kulo masipala osemehlweni omhlaba.
Lapho kwaboshwa umshayeli weloli lamanzi likamasipala eHammarsdale owabhadanywa nezigubhu eziwu-21 ezingamalitha angu-25 zigcwele udizili. Kuthiwa umsolwa wazivumela ukuthi lo mkhuba usudle umasipala imali elinganiselwa kuR900 000 okwakusekunezinyanga ezintathu ewenza.