Iyaphela indaba yokubala amashumi kuma-tollgate

I-FNB kanye ne-Visa sebeqedile ukukhipha ubuchwepheshe bokukhokha ngohlelo lwesimanje lwe-tap-and-go kuama-toll gate athile ngaphambi kwamaholide kaDisemba.

Abashayeli bezimoto ema-toll plaza aku-N3, TRAC N4 kanye nemigwaqo ekhokhelwayo e-Chapman’s Peak (eKapa) sebeyakwazi ukusebenzisa izindlela zokukhokha ezihlukene ngaphandle kokukhipha imali.

Imizila engaphezu kwama-88 ku-N3 phakathi kweGauteng neKwaZulu-Natal, e-De Hoek, eWilge, eTugela naseMooi River plaza, kanye nezindlela ezehlukene ezixhuma kulo thela-wayeka.

Kweminye imizila engu-73 asefakiwe amatheminali okukhokha ngohlelo lwesimanje emzileni okhokhelwayo kuN4 phakathi kwePitoli neMozambique, eDiamond Hill, Middelburg, Machado kanye neNkomazi plaza, kanye nasemajikeni angena naphuma kulo thela-wayeka.

Lolu hlelo luzosiza abashayeli bezimoto abasebenzisa ama-toll plaza ukuba basebenzise izindlela ezahlukene zokukhokha ngama-debit nama-credit card (i-Europay, Mastercard, Visa); izinhlelo zokukhokha ezifana ne-Apple Pay, i-Samsung Pay ne-Google Pay; kanye nabasebenzisa amawashi eGarmin, Fitbit, Samsung, Apple nabanye; kanye nezinye izinhlelo zokusebenza ezivunyelwe ukuthepha ezivumela ukusetshenziswa kwamakhadi asebhange akhishwe eNingizimu Afrika.

Amakhadi akwamanye amazwe nawo asezokwamukelwa kuma-toll plaza aseNingizimu Afrika.

Amakhadi e-Magstripe, adinga ukuthi ikhadi lokukhokha liswayitshwe ngokoqobo futhi akhishwa, ngeke esamukelwa ezindaweni ezingama-tap and go kusukela ngomhlaka-1 Disemba.

I-South African National Roads Agency kanye nezinye izinhlaka ezibhekelele ukusebenza kwemigwaqo emikhulu bazoqhubeka nokwamukela izinkokhelo ze-magstripe kuze kube nguMeyi 31, ngonyaka ozayo, kweminye imizila.

Amakhadi e-Fleet negaraji magstripe asengasetshenziswa kuze kube umhla zingama-30 kuJuni 2026.

Ngokusho kwe-Organisation Undoing Tax Abuse (OUTA), ukuqalwa kohlelo lwe-tap-to-pay isinyathelo esihle esizokwenza ukukhokhelwa kwe-toll kusheshe, kuphephe, futhi kube lula kubashayeli.

"Lo msebenzi ngokusobala uzosatshalaliswa ku-Q4 kuma-toll booths asetshenziswa yi-Bakwena (N1,N4). Sikholwa ukuthi ubalulele kakhulu njengoba uthuthukisa indlela yokusebenza," kusho uStefanie Fick, uMqondisi Omkhulu we-Accountability Division.

"Nakanjani lokhu kulungele abashayeli njengoba kuveza izindlela eziningi ezahlukene zokukhokha ngamakhadi namadivayisi esimanje, kanye nezinkokhelo ezidijithali ezifana ne-Apple, i-Google, i-Samsung ne-Garmin. Kwenza kusheshe futhi kuqinisekisa ukuphepha kubashayeli."