Inkosi ilaxaze isicelo sebheyili ecaleni lokubulala

INKOSI uSimphiwe Erick Zuma ilaxaze isicelo sebheyili ecaleni lokubulala lesithathu ebhekene nalo. 

Ummeli kaZuma, u-Advocate Sthembiso "Sticks" Mdladla, utshele inkantolo ukuthi uZuma ngeke asifake isicelo sebheyili ecaleni lokubulala uMnuz Xolani Ndlovu/Ntombela. 

Ukusho lokhu ngesikhathi uZuma evele kafushane eNkantolo yeMantshi eHowick. 

UZuma waboshelwa icala lokubulala uNdlovu/Ntombela ngeledlule. 

UNdlovu/Ntombela wabulawa ngo-2022, kuthiwa wayephikisana nokudayiswa komhlaba kamasipala eMasosheni, eMpophomeni. 

UZuma uvele usatokile njengoba eboshelwe icala lokusoconga owayeyikhansela leDA kuMasipala waseMngeni, uMnuz Nhlalayenza Ndlovu.

Isinqumo sokuthi uZuma uzoyithola yini ibheyili ecaleni lokubulala uNdlovu sizophuma ngoSeptemba 30.

UZuma uphinde abhekane necala lokubulala owayengundunankulu wesizwe sakwaNxamalala, uMnuz Qalokunye Zuma.

Kuleli cala uZuma wadedelwa ngebheyili kaR25 000. 

Abasolwa ababili ababoshwe noZuma ecaleni lokubulawa kukaNdlovu/Ntombela nabo ngeke bazifake izicelo zebheyili.

Kuleli uZuma uboshwe noMnuz Thembelani Mbatha kanye noMnuz Thabo Chonco.

UMbatha ushaye ungqimphothwe izolo watshela inkantolo ukuthi ngeke esasifaka isicelo sebheyili.

UMbatha wayekade etshele inkantolo ukuthi uzosifaka isicelo sebheyili ngesikhathi evele kafushane ngesonto eledlule.

UChonco yena uvele usezikhindini njengoba ebhekene necala lokuqotha umndeni waseBulwer elithethwa eNkantolo eNkulu eMgungundlovu. 

Icala lihlehlele uSepthemba 30 njengoba kulindwe isinqumo sikaMqondisi wezokuShushisa esifundazweni ngaleli cala.