USjava uhloniphe ingwazi kamaskandi eseyalala kobandayo

UMREPHA uJabulani "Sjava" Hadebe, wenze obekungalindelekile ehlonipha ngengoma ingwazi yomculo kamaskandi ebisilibalekile uSipho "Mahawukela" Mseleku. USjava uqambe ingoma esihloko sithi Gusheshe, esecwecweni lakhe elisha elisihloko sithi Inkanyezi 2.0. Kule ngoma apike kuyo uMandla "Shwi" Xaba, uSjava uhlanganise amanoni amane kaMahawukela okubalwa kuwo elithi Ngesab' Igazi Lomuntu, Ikhathosenta nelithi Ibanga Elincane.

UMahawukela owayedabuka eGubazi, eNquthu, wabulawa elokishini iTembisa, eGoli, ngoMeyi 19, 2000. Uyena owavumbulula ikhono likaShwi, Nikwani Ngobese wodumo kwiZingane Zoma, Mgqumeni Khumalo, Muhle Khuzwayo nabanye abaningi futhi ubenamaqembu anjengoBuhle Begubazi, Amatshitshi Amhlophe neZinsizwa ZakwaMseleku.

Ngaphandle kwalokho, ungumaskanda wokuqala owayengazidlaleli isigingci futhi wayeqhakambisa kakhulu le nto yobugcokama njengoba ayezibizwa ngeGcokama lakwaMseleku.  Ekhuluma emcimbini wokwethulwa kwaleli cwecwe eHue Cafe, eThekwini, ngeSonto, uSjava uthe okwamgqugquzela ukuba enze le ngoma kwaba yiBMW (igusheshe) ebubende kazakwabo futhi ongumkhaya wakhe, uSiyabonga "Big Zulu" Nene. Uthe yayifana ncamashi nekaMahawukela ngisho nangombala.

"Ngabe sengithi angithole uShwi ngoba uyena owasebenza kakhulu noMahawukela ukuba azongidlalela isigingci."

Uthe uthathe isinqumo sokuhlonipha uMahawukela ngenxa yokuthi ungumculi akhula emthanda. USjava ukhiphe leli cwecwe ngoLwesihlanu emuva kwempumelelo ye-EP esihloko sithi Inkanyezi, ebihambisana ne-DVD.

 “Isinyathelo sokukhipha i-EP asiwona nje umkhuba, kodwa wukuletha inkumbulo yangezikhathi ezedlule, ngesikhathi ukuqopha bukhoma kwakuyingxenye enkulu yomculo. Kuyinto ebengiyifisa kakhulu. Ukucula bukhoma akunamkhawulo futhi i-EP inikeza lowo muzwa weqiniso nowokuphila, into engasatholakali kalula kulezi zinsuku,” kusho uSjava.

Inkanyezi 2.0 Live EP yaqoshwa bukhoma eJoburg Theatre ngo-Agasti 15 no-16. Ihlanganisa izingoma ezinhlanu ezintsha ezihambisana nomoya wothando, okubalwa kuzo ethi Mdumise, Moya Wami nethi Sanibonani.

Khonamanjalo, uSjava, Big Zulu noLwah Ndlunkulu bazoshiyelana inkundla kwi-Old Mutual at the Lake Series eBotanic Gardens, eThekwini, ngoSepthemba 24 kusukela ngo-1 emini. Amathikithi aseyatholakala ngentengo ehlukahlukene eWebtickets.