IMbube iphefumule ngesikhathi sokukhetha eMhlangeni

ISILO uMisuzulu Sinqobile kaZwelithini sithi sesisishiywe yisikhathi sokuba sisangakhetha itshitshi eMkhosini woMhlanga.

INdlulamithi yamakhosi ithe izinkulungwane zezintombi ezihambela uMkhosi woMhlanga sezifana nezingane zayo. Ikusho lokhu ngesikhathi ikhuluma eMkhosini woMhlanga obusesigodlweni eMachobeni, eNgwavuma, ngoMgqibelo.

"Kambe ngisangayikhetha yini intombi? Angeke ngisakwazi. Ningabantabami nina. Omama benu balingana nami."

Nakuba kunjalo, iMbube ikhombise ukuba nesikhwele ngezimbali zesizwe njengoba ithe angeke ivume ukuba zidlale abafana.

"Niyizintombi zami nonke njengoba nilapha. Abafana anobatshela ukuthi niyizintombi zami. Uma ethi ufuna inombolo, ufuna ukukhuluma into ebheke eceleni, anobatshela ukuthi hamba uyokhuluma neNgonyama kuqala. Ngeke nami ngivume ukuphucwa intombi."

Umkhosi obungempelasonto wandulela uMkhosi woMhlanga omkhulu ozokuba sesigodlweni esisha, eMashobeni, oPhongolo, ngoMgqibelo.

ISilo sinxuse izintombi ukuba ziphume ngobuningi ngoMgqibelo. IMbube ithe amagama ezintombi ezizokuba ingxenye yomkhosi wakulo nyaka ayobhalwa emlandweni njengoba kuzokube kuqala ukuba ubanjelwe esigodlweni esisha.

Kule minyaka engu-40 eyedlule umkhosi ububanjelwa esigodlweni eNyokeni.

"Siyokwenza okukhulu kakhulu la esizojabula khona. Lapha khona nina zintombi nizokuba ngabokuqala ukuhambisa umhlanga esigodlweni esisha. Niyothi uma senixoxa ngelinye ilanga nisho ukuthi kwaba yini izintombi zokuqala ezahambisa umhlanga eMashobeni."

IMbube ithe kuzokuba kugcina emkhosini wakulo nyaka ukuba kube nezinkulumo ezinde ezethulwa osopolitiki.

Sekunesikhathi eside iMbube ikhala ngezinkulumo ezinde eMkhosini woMhlanga ithi zenza ukuthi izimbali zesizwe zingalitholi ithuba elanele lokuba zicule amahubo.

"Usuku lwanamhlanje olokuthi isizwe sibuke izimbali zisina, zikhangisa ubuhle bethu njengesizwe. Ilokho okwenziwa emhlangeni nokwayisifiso sikaMdlokomba (iSilo uGoodwill Zwelithini kaBhekuzulu) neNdlovukazi (Shiyiwe Mantfombi Dlamini Zulu) engizalayo.

"Isikhathi sezinkulumo sikhona. Livulwa yimi futhi iPhalamende. Ngifike ngisho ukuthi sesiyalivula iPhalamende, sesingakhuluma ke manje. Bona bafuna ukuzokhuluma nalapha eMhlangeni. Ngonyaka ozayo nje akukhulunywa. Sifuna ukuthi izingane zifike lapha zisine. Sifuna ukuthi nithi niyolala nibe nikhathele. Ngoba uma nishaya phansi unyawo nisuke nivusa nalaba abalele ngoba nisuke nenza usiko."

IMbube iveze ukuthi ihlela umcimbi omkhulu noMnyango wezamaSiko nobuCiko ozohlanganisa onke amakhosi ase-Afrika.

"Lapho bazokube bezosikhombisa ukuthi amasiko abo bawenza kanjani nokuthi bekhangise usiko mpilo lwabo sibuka. UNgqongqoshe kazwelonke ucele ukuthi isihlalo sikaZulu kube yiso esihlela lo mcimbi. Kuzokube kubizwe onke amakhosi ase-Afrika."