I-Menopause ifika nezinguquko eziningi kumuntu wesifazane

U-AGASTI awupheleli emigubheni nasezinhlelweni ezahlukene zokukhumbula iqhaza elibanjwa ngabantu besifazane emphakathini nasezweni lonke phecelezi i-Women's Month, kepha futhi waziwa nangokuthi yi-Hair Loss Awareness Month, lapho okusuke kwenziwa khona izinhlelo nemikhankaso eyahlukene yokuqwashisa abantu ngokuqothuka kwezinwele.

Udokotela wesikhumba ozimele ozinze eThekwini uDkt Cebi Sibisi uthe lesi yisikhathi esihle kakhulu sokukhuluma ngokukhululeka ngezinguquko abantu besifazane abaningi ababhekana nazo ikakhulu uma sebesesigabeni se-menopause, lapho abasuke bengasangeni ezinsukwini zabo nyangazonke futhi bengeke besakwazi ukukhulelwa, bazale izingane.

"I-menopause yisigaba esenzeka empilweni yawo wonke umuntu wesifazane uma esekhulile, esiza nezinguquko eziningi emzimbeni kubandakanya ukuba namabala namaqhuqhuva ebusweni, ukuqothuka kwezinwele, ukushintsha kombala wesikhumba nokuthi some nkwe, kanti zonke lezo zinguquko kungaba nzima ukuzamukela uma ungazi ngazo," kucebisa uDkt Sibisi.

Uthe konke lokhu kudalwa wukuthi isikhumba nezinwele kuyakhombisa uma kuwukuthi sekunezinguquko ezenzeka emzimbeni wakho ikakhulu kwabesifazane, okudinga ukuthi abantu bakuqonde lokhu kusenesikhathi ukuze kungabagqilazi emqondweni uma sekwenzeka.

Kungani isikhumba nezinwele kushintsha uma usungene kwi-menopause?

Lokhu kungenxa yokuthi i-hormone ebizwa nge-oestrogen, esiza ukugcina izinwele nesikhumba kunempilo, iya ngokuya incipha emzimbeni uma owesifazane esekwi-menopause, okuzoqapheleka ngalezi zimpawu ezilandelayo:

- Ukuphela kwe-collagen ne-elasticity emzimbeni, okwenza ukuthi isikhumba sigoqane, kube nemigqa ehlukanisa izinwele, kube nezikhala phakathi kwazo.

- Ukoma kwesikhumba ngokweqile kunokwejwayelekile.

- Ukuba namabala namaqhuqhuva ikakhulukazi ebusweni nasezandleni.

- Ukuncipha kwezinwele ezinhlangothini zekhanda nasokhakhayini.

- Ukumila koboya obumhloshana ebusweni.

UDkt Sibisi unamathiphu angasiza ukubhekana nezinguquko ze-menopause:

- Ukuphuza amanzi amaningi ngosuku, uwathake ngezithako zezithelo ezinempilo ukusiza ukubuyisa amandla esikhumbeni.

- Ukusebenzisa imikhiqizo ye-sunscreen usakhula nje ukuze ukhule isikhumba sakho siyijwayele.

- Sebenzisa imikhiqizo egunyazwe ngabezempilo yokususa amabala namaqhuqhuva ebusweni nasemzimbeni.

- Qaphela indlela oyisebenzisa ukunakekela isikhumba sakho njengoba sizwela kalula kunoma yini oyisebenzisa kusona.

- Lala ngokwanele futhi ugweme izinto eziphazamisa umqondo wakho ngoba ukugqilazeka emqondweni kudala ingcindezi esikhumbeni sakho. 

- Gwema ukudla okusheshayo nokunamafutha amaningi, bese ugxila kokunempilo okungaba yizithelo, imifino nokunama-protein.

- Gwema ukugeza ngamanzi ashisa kakhulu ngoba aba nomthelela omubi esikhumbeni sakho. 

"Wonke umuntu wesifazane ubhekana nezinguquko ze-menopause ngendlela ehlukile nehambisana nendlela adalwe ngayo, ngakho akumele ukuthi ubhekane nalezi zinguquko wedwa ngoba zikhona izindlela zezempilo zokuzixazulula," kucebisa uDkt Sibisi.