Inengekile indodakazi kamufi usingababa ehleka kuvela elomhlathi enkantolo
INDODAKAZI kaNksz Thandokuhle Mkhize, u-Aphiwe Mkhize, noqwembe olunomyalezo obhekiswe kusingababa wakhe osolwa ngokubulala unina
Image: ZIMBILI VILAKAZI
INENGEKILE indodakazi yommeli osanda kubulawa ngesihluku ngesikhathi umsolwa oyiphoyisa likaMasipala weTheku, ehleka kuvela elomhlathi ngesikhathi evela eNkantolo yeMantshi yaseThekwini izolo.
USenior Constable Qiniso Sishi (40), ubevele enkantolo ngecala lokugwaza, abulale unkosikazi wakhe, uNkk Thandokuhle Sishi (48) ngoJulayi 27, 2025, emzini kamufi oseMontclair.
Ngesikhathi uSishi evela enkantolo izolo bekulindeleke ukuthi afake isicelo sebheyili.
ABABHIKISHI ngaphandle kweNkantolo yeMantshi yaseThekwini ngesikhathi kuvela iphoyisa likaMasipala weTheku elisolwa ngokubulala inkosikazi ewummeli
Image: ZIMBILI VILAKAZI
Nokho ngesikhathi uMbuso, ngomlomo kaNksz Beauty Cele, uveza ukuthi usukulungele ukuthi kulalelwe isicelo sebheyili, ummeli wakhe uMnuz Musawenkosi Mkhize, uveze ukuthi akakulungele ukwenza lokhu.
Udalule ukuthi ngoLwesihlanu wayehlele ukuthi babe nengxoxo nomsolwa okwagcina kungenzekanga njengoba bagcina bengabonananga.
“Ngafika ejele laseWestville ngahlala isikhathi esingaphezu kwamahora amabili ngimlindile. Ngathola ukuthi usematasa nabezempilo njengoba egcinwe endaweni yabangaphilile ejele,” kusho uMkhize.
UMSOLWA, uSenior Constable Qiniso Sishi osolwa ngokubulala inkosikazi, ebonakala ezihlekela ngesikhathi evela eNkantolo yeMantshi yaseThekwini
Image: ZIMBILI VILAKAZI
Uthe wenze imizamo yokuthi atholelwe umsolwa ukuze baxoxe, nokho kwavela ukuthi akekho obenolwazi lokuthi ukuphi kahle hle.
“Ngigcine ngingakwazanga ukuthatha imiyalelo kuye, ngakho angikwazi ukuqhubeka nokufaka isicelo sebheyili. Ngizobe angibenzi ubulungiswa,” kusho uMkhize.
IMantshi, uMnuz Ashwin Singh, ilihlehlisele uMsombuluko ozayo icala ukuze umsolwa afake isicelo sebheyili.
USENIOR Constable Qiniso Sishi osolwa ngokubulala inkosikazi ewummeli evela eNkantolo yeMantshi yaseThekwini
Image: ZIMBILI VILAKAZI
Umsolwa, obesasibhandishile isandla sangakwesobunxele, uqale wamoyizela ngesikhathi ethatha ikhona, ehla ngezitebhisi ezibheke esitokisini.
Ithe indodakazi kamufi, u-Aphiwe Mkhize (18) engazalwa wuSishi, uma ikhipha amazwi athi “sengathi ungabolela ejele”, umsolwa wavele wahleka kwavela elomhlathi.
Ngaphandle kwenkantolo u-Aphiwe uthe kumdinile, kwamphatha kabi futhi kwamthusa ukubona umsolwa ehleka.
“Ngibone ezihlekela nje, sengathi ukubulala kwakhe umzali wami kuyinto engelutho. Ngizwa ubuhlungu ngokuthi yena ukwazi nokumoyizela, ahleke ekubeni owami umama eshonile,” kusho u-Aphiwe.
Uthe usenze ngisho ne-petition ukuthi abantu bayisayine, ukuze bamlekelele ekutheni aphikisane nokuthi adedelwe ngebheyili.
Uveze ukuthi akamfiseli ukuthi afe kodwa ufisa abolele ejele, naye ezwe ubuhlungu abuzwayo njengamanje ngokumphuca umuntu obeyikho konke kuye.
“Umama wami ubeyikho konke kimi, ubewumzali, abe wumngani. Manje ngisele dengwane, impilo ayilula nhlobo ngaphandle kwakhe,” kusho u-Aphiwe.
Uqhube wathi unina ubemthanda kakhulu umsolwa, emhlonipha kodwa yena wakhetha ukumbulalisa okwesilwane.
Kulokhu u-Aphiwe ubephethe uqwembe olunomyalezo othi: “Ngiyathemba ukuthi ezobulungiswa ngeke zimenzele phansi umama wami ngokuthi zidedele umsolwa ngebheyili. Ngifisa angafi kodwa abolele ejele. Ngifuna ubulungiswa ngoThando Mkhize (Sishi).”
Ngaphakathi enkantolo bekugcwele ngendlela yokuthi kuze kwaba khona abazama ukuhlala phansi. Inkantolo ishaye phansi ngonyawo yathi abangayitholanga indawo yokuhlala emabhentshini, abaphume bayolinda ngaphandle.
Ngaphandle enkantolo bekukhona inqwaba ebibhikisha igqoke izimpahla zeMKP iphethe nezingqwembe ezibhalwe imiyalezo eyahlukene.