Ithuba lokuhlomula ngamateku kwiSolezwe Cup
UNKSZ Nothando Luthuli wophiko lwezokumaketha enkampanini yamateku i-Ifelom
Image: SITHUNYELWE
UKUHAMBELA umqhudelwano webhola lezinyawo wephephandaba lakho lesiZulu olithandayo nelihamba phambili Isolzwe Soccer Cup akuzukujabulisa izethameli ngemidlalo yebhola kuphela njengoba abazobe bekhona kulo mcimbi besethubeni lokuhlabana ngezipho nemititilizo okwehlukene nokuhlabahlosile kwamahhala.
Lo mqhudelwano uzodlalelwa e-SJ Smith Stadium, eWema kusasa ngo-10 ekuseni - lapho abazobe bewuhambele bezoba nethuba eliyingqayizivele lokubona ithimba lezintatheli zeSolezwe ligadulisana enkundleni kuze kusiphuke izidindi nethimba lomsakazo Ukhozi FM.
AMATEKU enkampani i-Ifelom okuzophiswana ngawo emqhudelwaneni Isolezwe Soccer Cup
Image: SITHUNYELWE
Okunye okuhle okuzokwenzeka kulo mcimbi wukuthi inkampani eyenza amateku i-Ifelom izophisana ngomkhiqizo wamateku ayo mahhala kubabukeli abazoba nenhlanhla, futhi wenze okufanayo kwabazoba ngabadlali abavelele kwabesilisa nabesifazane.
AMATEKU enkampani i-Ifelom okuzophiswana ngawo emqhudelwaneni Isolezwe Soccer Cup
Image: SITHUNYELWE
Lezi zindaba ziqinisekiswe wuNksz Nothando Luthuli wophiko lwezokumaketha kule nkampani ezinze ePinetown, eThekwini, wazibophezela ngokuthi bazobe bekhona bezojabula nabathandi bezemidlalo nabafundi bephephandaba Isolezwe.
"Inhloso yethu wukufaka ivangeli lokuzivocavoca nokuzigcina unempilo ngokuzibandakanya nezemidlalo eyahlukene, yingakho kwathi uma sibona isikhangiso salo mqhudelwano weSolezwe sasukumela phezulu sabona ukuthi asifake isandla ukuqhuba umbono wethu ngokubambisana nawo. Asikugcina lapha njengoba sizoqhubeka futhi senze okufanayo nakwezinye izinkampani esihlela ukusebenzisana nazo ngomuso," kusho uNksz Luthuli.
Le nkampani yasungulwa wuGeorge Molefe ngo-Ephreli nonyaka, kanti imikhiqizo yayo yamateku abesilisa nawabesifazane itholakala esitolo sayo sa-online esithi: https://ifelom.co.za/ ngoR1 400 kuya phezulu.