ESINYE sezitshudeni zaseDurban University of Technology (DUT), esingomunye wabagijimi abazobe beqala ukungenela umjaho ohlonishwa emhlabeni jikelele, iComrades Marathon, sesidalule ukuthi sizibekele umgomo wokugijima size sifike ekugcineni kwalo mjaho engakapheli amahora angu-12 uma seziqhuthana amazenze ngeSonto.
UNksz Nonhlanhla Siyaya, owenza iMaster's in Biotechnology eDUT, ungomunye wabangu-26 bakule nyuvesi abazobe begijima kulo mqhudelwano nonyaka, ozobe usuka eMgungundlovu uya eThekwini. Kulo mjaho kuzobe kuncintisana abagijimi abangaphezu kwa-22 000 basemazweni ehlukene emhlabeni wonke.
UNksz Siyaya (27) waseMpangeni, enyakatho yaKwaZulu-Natal, uthe uze ufika kulesi sigaba nje uqale ukugxila kwezemidlalo nokuzivocavoca ngabo-2022, nakhona ezenzela nje ukugijima amabanga amafishane, okuthe ngokuqhubeka kwesikhathi nangokweseka ikakhulu kubo, wakhuthala ukuqhubeka nalo mdlalo.
"Kuthe ngonyaka odlule ngaqala ukulungiselela lo mjaho wanonyaka, ngenzela nokuthi nginganaki kakhulu ingcindezi ebengibhekene nayo ezifundweni zami, ngisizwa kakhulu wubhuti wami omncane uBonga obengikhuthaza kakhulu. Ngizobe ngihamba naye ngeSonto njengoba naye engomunye wabangenele umncintiswano njengami," usho kanje.
Kulaba abanye abagijimi abawu-25 baseDUT, kukhona amalungu amabili esigungu esiphezulu esihola lesi sikhungo okukhona kuwona isikhulu esiphezulu sophiko lwezezimali uMnuz Siboniso Shabalala, nephini likashansela lophiko lwezokufunda nokufundisa uSolwazi Vusi Gumede.
Kukhona nabasebenzi abawu-13 bakule nyuvesi oMnuz Thabani Mhlongo, Mnuz Steven Mkhize, Mnuz Samuel Mtsanwisi, Mnuz Sandile Ngema, Nksz Collen Lotz, Mnuz Patrick Mhlongo, Mnuz Sibusiso Sotsaka, Mnuz Lindokuhle Manyoni, Mnuz Lungelo Zulu, Mnuz Wesley Ngcobo, Nkk Lauren Snell-Hillermann, Mnuz Mthobisi Ntuli noMnuz Nkeka Tseole.
Kwizitshudeni kukhona oNqobile Mngadi noNgceba Kenisa; bese kuba ngabayisishiyagalombili abafunde eDUT oMnuz Craig Denhill, Nksz Yenzi Olifant, Mnuz Sibusiso Mdladla, Mnuz Xolani Mkhize, Mnuz Khayelihle Ngubane, Mnuz Katlego Molomusi, Mnuz Skhumbuzo Mthembu noMnuz Bandile Ndaba.
IPhini likashansela lophiko olubhekele ukusebenza kwenyuvesi, uDkt Vuyo Mthethwa, lithe beyinyuvesi bajabule kakhulu ukuthi nonyaka sandile isibalo sabazogijima kulo mqhudelwano, njengoba nyakenye babewu-17, okukhombisa umehluko omkhulu.
“Siyaziqhenya ngani nonke futhi sithemba ukuthi ngosuku lomcimbi nizosikhombisa ukuthi nizilungiselele kangakanani ukwenza isiqiniseko sokuthi konke kuhamba kahle. Akukhona ngokunqoba kuphela, kepha okumqoka kakhulu wukuthi nenze umsebenzi omuhle nesizokwazi ukuziqhenya ngawo kubhekwe phambili,” kusho uDkt Mthethwa.