IMOTO: SUZUKI FRONX
IYAQHUBEKA nokudlondlobala eNingizimu Afrika iSuzuki Auto South Africa njengoba ukuthengwa kwezimoto zayo kulokhu kunyuka.
Ekuqaleni kwenyanga le nkampani ibigubha ukudayisa imoto yayo ka-200 000 kusuka yaqala ukuvula igaraji lokuqala ngo-2008.
Kulokhu kuqale unyaka ilele endaweni yesithathu ngokudayisa ezimotweni ezincane futhi igebe phakathi kwayo neVolkswagen Group South Africa kalikhulu neze. Endaweni yokuqala kukhona iToyota Motors South Africa.
Ukuthengwa kwezimoto zayo kubukeka kuzoqhubeka njengoba kuleli sonto yethule iSport Utility Vehicle (SUV) encane iFronx.
Ibheke ukuthatha abathengi beHyundai Venue, Renault Kiger, Nissan Magnite namanye amancane.
Le SUV ingena ngaphansi kweGrand Vitara esanda kutheleka eNingizimu Afrika.
Izishaya sa-coupe njengoba ukhakhayi lwayo ngemuva luba yisibaca okuyinto ebukeka izoheha abathengi, ikakhulukazi abasebasha abathanda nemoto enesitayela.
I-Fronx ihlukene ngezinhlobo ezine, okuyiGL manual, GL automatic, GLX manual neGLX automatic. Zonke zinenjini eyodwa engu-1.5 litre kaphethroli edumile ezimotweni zale nkampani njengoba ikhona nakwiBaleno, okuyi-hatchback.
Le njini engenayo i-turbo inamandla angu-77kW ne-torque engu-138Nm. Igearbox eyi-5 speed manual okanye eyi-4 speed auto.
Yize aneSuzuki bethi babona i-auto kuyiyo ezothengwa kakhulu kodwa i-manual yiyo okumnandi ukuyishayela uma ungumuntu othanda amandla.
Ukuzishintshela igiya kwenza kube lula nokudlula enye imoto ngoba uvele uwehlise ngokushesha bese ulanda amandla. Ezintshayo imnandi uma uhamba edolobheni okunesiminyaminya kulo ngoba unyawo lwesokunxele lusuke luphumule.
Izwakala ivilapha futhi ubuye uzwe emgwaqweni ovulekile ukuthi igiya lesihlanu belingenza ikhululeke uma usushushuluza ngo-120km/h.
Iphakeme njengoba igabade ilishiye ngu-170mm.
Ngale kwalokho iGL yiyo eyisingeniso emndenini njengoba inezinto ezincane kuneGLX. Engikuthandile wukuthi ivulekile ngaphakathi isikhala sabagibeli sikhona namadolo awampintsheki kalula kwabangemuva.
Ibhuthi ingu-308 litres, okuthi uma ulalise izihlalo zangemuva sibe ngu-605 litres.
I-GL ifika namarimu amnyama angu-16 inch, amalambu angamaLED. Uyakwazi ukuyithola ngombala ongafani nokhakhayi, i-touchscreen infotainment system engu-7 inch okwazi ukuxhuma kuyo iselula nge-Applee CarPlay noma i-Android Auto ngaphandle kwentambo, ikhamera ngemuva ine-auto climate control.
Amarimu kwi-GLX nawo angu-16 inch kodwa ahlukile, i-infotainment system inkudlwana ingu-9 inch, inendawo yokushaja ngaphandle kwentambo, head-up display, idunyiswa ngebhathini nama-roof rails asiliva.
Kwezokuphepha zonke zinamabhreki e-ABS, EBD ne-Electronic Stability Programme. I-GL inama-airbag amabili ngaphambili, kuthi iGLX ibe nayisithupha
Intengo:
Fronx 1.5 GL manual – R279 900
Fronx 1.5 GL automatic – R299 900
Fronx 1.5 GLX manual – R315 900
Fronx 1.5 GLX automatic – R R335 900
Zifika ne-service plan yeminyaka emine noma u-60 000km ne-warranty yeminyaka emihlanu noma u-200 000km.