Iwubukhosi emgwaqweni iJeep Grand Cherokee

IMOTO: JEEP GRAND CHEROKEE

NGEMUVA kwezinyanga eziyisishiyagalolunye kuqale ukudayisa iJeep Grand L elayisha abagibeli abayisikhombisa, sebeyilamanise ngeGrand Cherokee egibeza abayisihlanu.

NjengeCherokee L, ihlukene ngezinhlobo ezintathu okuyiLimited, Overland neSummit Reserve. Zonke zishibhe ngo-R20 000 ngqo uma uziqhathanisa nezilayisha abayisikhombisa.

IGrand Cherokee yimoto enomlando kwazise iqale ukudayisa kusuka ngo-1992 futhi sekwenziwe izinhlobo ezine njengoba entsha kungeyesihlanu. Bathi sebedayise angaphezulu kuka-7 million emhlabeni jikelele.

Ngaphandle ibukeka njengeGrand Cherokee L kodwa yona iqoqekile kahle kwazise imfishane.

Zonke zifika namalambu angamaLED ngaphambili nangemuva, yi-sunroof okhakhayini (panoramic suroof kwiSummit Reserve) kanjalo namarimu agcina ku-21 inch kwiSummit Reserve.

Okunye ezifana ngakho yinjini engu-3.6 litre Pentastar V6 kaphethroli edumile ezimotweni zakwaJeep njengoba neGrand Cherokee L ihamba ngayo.

Inamandla angu-210kW ne-torque engu-344Nm. Isebenzisa u-gearbox oyi eight-speed ozishintshayo. Ngesikhathi ngiyishayela ngisuka ePitoli ngibheke eBela Bela, eLimpopo, ngiyizwe ingasindi kakhulu njengeGrand Cherokee L ongatshelwa wumuntu ukuthi ushayela imoto enkulu. Ishintsha kahle futhi emgwaqweni ovulekile iwubukhosi. Indaba iqala uma usufuna ukunyusa amandla ngokushesha yilapho evilapha khona ngoba ilinyusa kancane ijubane yize kungafani nakwiGrand Cherokee L.

Kuphethroli bathi idla amalitha angu-9.9 ngo-100km.

IJeep Grand Cherokee entsha ihlukene ngezinhlobo ezintathu - yiLimited, Overland neSummit Reserve. Zontathu zishibhe ngoR20 000 uma uziqhathanisa neGrand Cherokee L elayisha abagibeli abangu-7 efike ngonyaka odlule. #JeepSA #JeepGrandCherokee @IsolezweNews pic.twitter.com/TsGRClRoXx

— Fanelesibonge Bengu. (@FaneleBengu) May 10, 2023

IJeep iyaziwa ngokuba yisiqwalantaba nokuyingakho uke ubone iGrand Cherokee ihamba izikhulu zikahulumeni ngoba zethembe ukuthi ngeke zibhajwe uma zihambise intuthuko ebantwini.

Kule linyusiwe izinga lendlela ehamba ngayo ogwadule.

Siyifaka eSerendipity Eco Trails lapho siyivivinya khona ukuhamba ogwadule, ilivezile ikhono layo. Igabade ilishiye ngo-287 mm. Iyakwazi ukuphakama njengoba ine-air suspension futhi inama-drive modes ahlukene okukhona kuwo noRock uma uhamba ematsheni. InoLow range ukuze ifohle iphinde ibe neHill Descent Control esiza uma usendaweni eyehlelayo izibhrekele yize ngiyizwe ibamba kude usuzitshela ukuthi ayisebenzi.

Baphinde bayinyusa nezinga lezokuphepha njengoba imtshela umshayeli uma ezoshayisa iphinde ibhreke, iyasho uma iphuma emzileni, inama-sensor asiza uma upaka, ine-adaptive cruise control, iyasho uma kunemoto eseceleni ungayiboni kanjalo nokuthi ibike uma kunomoya owehlile emasondweni.

IGrand Cherokee ine-wheelbase emfishane kuneyeGrand Cherokee L engu-2 964mm. Yize incane kodwa isikhala sikhulu ngaphakathi futhi inkulu kunendala.

Izihlalo ziyisikhumba futhi ezangaphambili zihlelwa ngogesi ziphinde zifudumale noma zibande. Ezinhlotsheni eziphezulu ziphinde zikuwotawote.

Ngaphambili ine-touchscreen infotainment system kanjalo ne-digital cluster kokubili okugqame kahle. Uxhuma iselula nge-Apple CarPlay/Andoid Auto nokunye uphinde udlale umculo ezipikheni ezikhala kamnandi zeMcIntosh.

Umgibeli naye unesakhe i-screen eceleni abona kuso inkombandlela, azibukele ifilimu nokunye. Umshayeli akaboni okwenzekayo.

Engikuthandayo ukuthi kunenqwaba yezindawo zokushaja ngaphakathi.

Intengo:

Jeep Grand Cherokee Limited 3.6L 4x4 8AT - R1,329,900

Jeep Grand Cherokee Overland 3.6L 4x4 8AT - R1,539,900

Jeep Grand Cherokee Summit Reserve 3.6L 4x4 8AT - R1,735,900

Zonke ziphuma ne-maintenance plan yeminyaka emihlanu noma u-100 000km ne-warranty yeminyaka emihlanu noma u-100 000km.