IJAC Motors yethule inkosi yamaveni ayo

IMOTO: JAC T9

Iyaqhubeka nokungenisa eNingizimu Afrika inkampani yaseChina, iJAC Motors njengoba seyethule iveni yayo entsha iT9 double cab okuyilo elingumakhonya emndenini wabo.

IJAC Motors iqale ngo-2007 ukwakha amaveni nezimoto ezincane njengoba yayakha amaloli phambilini.

Isikhulu sakwaJAC Motors South Africa, u Karl-Heinz Göbel, sithe bayajabula ngokuletha leli veni elakhelwe amakhasimende afuna ukuhamba ngemoto entofontofo futhi ehamba sengathi yimoto encane.

UGöbel uthe kule minyaka eyisithupha eyedlule bandise amagaraji abo njengoba esengaphezu kuka-70 e-Afrika eseNingizimu.

I-T9 ilandela iT6 double cab neT8 double cab asevele edayisa eNingizimu Afrika.

Ihlukene ngezinhlobo ezine okuyiLux neSuper Lux, okungama-4x2 nama-4x4 futhi ikwazi ukudonsa isisindo esingu-3 500kg.

Zonke zinenjini engu-2.0 litre turbo-diesel. Ezinye izinhlobo zezinjini okungekaphethroli, ekagesi neyi- plug-in hybrid electric vehicle kuthiwa zihlelelwe unyaka ozayo.

Le njini kadizili inamandla angu-125kW ne-torque engu-410Nm. Idonsa ngo-gearbox oyiZF eight-speed automatic othumela amandla emasondweni angemuva.

I-4x4 ino-4L kanjalo ne-diff lock futhi igabade ilishiye ngo-210mm.

Kudizili bathi i-4x2 idla amalitha angu-7.8 ngo-100km ethangini elingu-76 litres.

I-T9 inamaLED daytime running lights, Xenon headlamps, fog lamps ne-grille enkulu. Inamarimu angu-18 inch namaLED lights ngemuva.

Ngaphakathi inezihlalo zesikhumba, isiteringi esinamabhathini, sunroof nokunye.

Ine-touchscreen infotainment system engu-10.4 inch okwazi ukuxhuma kuyo iselula nge-Apple CarPlay/Android Auto futhi iveza nengaphandle njengoba inamakhamera emzimbeni.

Kwezokuphepha iyasho uma isondo lehlelwa umoya, anti-lock braking system, electronic stability control, hill-start hold control, nokunye okuningi.

Intengo:

T9 2.0L CTi 4×2 Lux: R529,900

T9 2.0L CTi 4×2 Super Lux: R579,900

T9 2.0L CTi 4×4 Lux: R599,900

T9 2.0L CTi 4×4 Super Lux: R649,900

Ifika ne-warranty yeminyaka emihlanu noma u-100 000km, i-service plan yeminyaka emihlanu noma u-100 000km ne-roadside assistance.