IMOTO: HONDA WR-V
IHONDA Motor Southern Africa yandisa umndeni wayo wamacompact sport utility vehicle (SUV) ngokwethula entsha sha iWR-V.
Le moto izobanga abathengi nezimoto ezifana neVW T-Cross, Ford EcoSport, Hyundai Venue nezinye.
Isikhulu sakwaHonda Motor Southern Africa uYuishi Fakuda sithe isigaba samaSUV amancane sikhula ngamandla kuleli njengoba kudayiswa izimoto ezingaphezu kuka-50 000 ngonyaka.
Uthe bafuna ukuba nezimoto kusona futhi iWR-V izodlala indima enkulu. Le moto ingena ngaphansi kweHonda HR-V.
Ifika namaLED daytime running lights kuthi i-Elegance ibe namaLED projector headlamps namaLED fog lights.
Emasondweni inamarimu angu-16 inch kuthi ngemuva ibe namalambu angamaLED namaroof rails okhakhayini.
Ngaphakathi ilayisha abagibeli abahlanu futhi isikhala ebhuthini singu-363 litres kuthi uma ulalise izihlalo sibe ngu-881 litres.
Uyakwazi ukulalisa nesihlalo sangaphambili uma ufuna isikhala esithe xaxa sokulayisha impahla.
Ngakwi-infotainment system, iComfort ifika nomsakazo okwazi ukuxhuma iselula ngeBluetooth noma i-USB. I-Elegance yona ineseven-inch touchscreen infotainment system okwazi ukuxhuma kuyo iselula nge-Apple CarPlay okanye i-Android Auto.
Zombili zinamasensor ngemuva asiza uma upaka kuthi i-Elegance ibe nekhamera.
Zombili futhi zihamba ngenjini efanayo engu-1.2 litre kaphethroli enamandla angu-66kW netorque engu-110Nm. Zinogearbox oyi-5 speed manual kanti ngo-100km bathi zisebenzisa amalitha kaphethroli angu-6.4.
Ngakwezokuphepha inama-airbag ayisithupha, indawo yokufaka isihlalo sengane, amabhreki e-ABS ne-EBD.
Amanani
WR-V 1.2 Comfort MT R289 900
WR-V 1.2 Elegance MT R319 900
Iphuma neservice plan yeminyaka emine noma u-60 000km, warranty yeminyaka emihlanu noma u-200 000km ne-AA Roadside Assistance yeminyaka emithathu.
