IFord Ranger inqobe isicoco se-2023 SA Car of the Year
|Published
IFord Ranger double cab iqophe umlando idla isicoco se-2023 South African Car of the Year (Coty) nokuyenze yaba yiveni lokuqala ukuwina selokhu umncintiswano wasungulwa eminyakeni engu-37 edlule.
IRanger, eyethulwe eNingizimu Afrika ngasekupheleni konyaka odlule, ihlule izimoto ezingu-20 ebese isele nazo kowamanqamu kwezingu-55 ebezisembangweni.
Lo mncintiswano obuxhaswe yi-Old Mutual Insure, uhlelwa yiSouth African Guild of Mobility Journalists.
Amajaji omncintiswano kuba yizintatheli zezimoto ezikhethekile ezingamalungu ale nhlangano okukhona kuzo nombhali walolu daba.
Umcimbi wokumemezela izimoto ezinqobile ubuseGoli ngoLwesine ebusuku.
USihlalo womncintiswano iCoty, uMabuyane Mabuza, uthe ukuwina kweRanger kuwubufakazi bokuzimisela kwemboni ekwakheni ama-double cab asezingeni.
“Kule minyaka edlule udumo lwamaSUV nama-double cab lunyukile esikhundleni sama-sedan. Ama-double cab asephenduke imoto ethandwayo ukuhamba ngayo nsukuzonke, ukuzikhipha nemindeni, ukwenza imisebenzi ehlukene nokuba yisisombululo kubantu baseNingizimu Afrika,” kusho uMabuza.
IChery Tiggo 8 Pro inqobe emunxeni weMotor Enthusiasts Choice okuwumunxa ovotelwe ngabantu ezinkundleni zokuxhumana.
IMercedes-Benz S-Class yona idle oweCoty Jurors Excellence Award.
Selulonke uhla lwezinqobile lumi kanje:
Compact Family Category: BAIC Beijing X55
Midsize Category: KIA Sportage
Premium Category: KIA Sorento
Adventure SUV Category: Ford Everest
Double Cab 4x4 Category: Ford Ranger
Luxury Category: Mercedes Benz S-Class
Performance Category: Audi RS 3
New-energy Category: Volvo XC 40 P8 Recharge
2023 SA Car of the Year: Ford Ranger Double Cab 4x4