Ukuzivocavoca kodwa akwanele ukuqeda umkhaba kwabesilisa

UKUNGAKHULULEKI nokuba nezinto eziningi ezikugqilazayo emqondweni  kungaba ngesinye sezizathu ezenza ukuthi ube nenkinga yokungakwazi ukwehlisa isisu esikhulu, okwaziwa ngokuthi wumkhaba yi-cortisol belly ngesilungu. 

Lokho kuvezwe ngabesikhungo sezempilo esizimele i-Affinity Health, bedalula nokuthi uma ukhwantalala seluyibambe kahle indoda, ngisho noma ngabe iphila impilo ecolekile futhi imandla nasekuzivocavoceni, kodwa kungaqhubeka kube yinkinga ukunqoba inkinga yomkhaba.

Iyini yona i-cortisol belly?

- I-Cortisol belly wukunqwabelana kwamafutha esisiwini ngenxa yokuba phezulu kwesilinganiso se-cortisol emzimbeni, okuyi-hormone yokhwantalala. Nakuba le hormone isiza ukulawula isilinganiso sokhwantalala nokugqilazeka komqodno womuntu, kodwa uma lokho sekungaphezu kwamandla futhi kulokhu kuqhubeka, kungenza ukuthi umzimba ugcine amafutha amaningi esiswini.

Nazi izimpawu ezingakhomba ukuthi unale nkinga:

1. Ukuba nomkhaba onganciphiseki: Uma uthwele kanzima ukunciphisa isisindo somzimba wakho ikakhulu umkhaba ekubeni udla ukudla okunempilo futhi ukhuthalele nokuzivocavoca, lokho kungaba wuphawu lokuthi ubanjwe yi-cortisol belly. Le nkinga yehluke ngokuthi yona ayifani nokukhuluphala ezingxenyeni ezithile zomzimba, ayilawuleki kalula esiswini.
2. Ukuhlae uhalela ushukela nokudla okunamafutha: Uma le nkinga isikuhaqe kahle yenza ukuthi uhlale uhalela ukudla okunamafutha noshukela omningi, okuyingozi kakhulu ngoba akwenzi mehluko, kunalokho kubhebhethekisa inkinga yakho.
3. Ukuhlale ukhathele: Uma le nkinga isidlebeleke mawala ingenza ukuthi kungalaleki kahle, okungenza ukuthi uhlale ukhathele futhi ungabi namdlandla wokwenza lutho, ngakho uma kuvama ukuthi uthi uvuka nje, uzizwe ukhathele noma wehluleke ukumelana nezinto okumele uzenze osukwini, lokho kungaba wuphawu lwale nkinga emzimbeni wakho.
4. Ukuhlale ugqilazekile emqondweni futhi unexhala: Ukugqilazeka emqondweni isikhathi eside nokuba nexhala lokukhathazeka ngezinto eziningi nje okungapheli kungaba wuphawu lwale nkinga.
5. Umfutho ophezulu wegazi: I-cortisol ibamba iqhaza elikhulu ukulawula ukugijima kwegazi emzimbeni, ngakho uma kwenzeka ukuthi umfutho wegazi lwakho usuhlale uphezulu kunendlela ejwayelekile kungasho ukuthi wuphawu lomonakalo ongahamba uze ufike esigabeni lapho usuphathwa yisifo sikashukela u-type 2. Uma ukhathazekile ngomfutho wegazi lakho, phuthuma emtholampilo oseduzane noma ubonane nodokotela ukubheka ukuthi konke kusahamba kahle yini.
6. Ukugangayeki kokudla nokuqunjelwa: Ukuhlale ugqilazekile emqondweni okudalwa yilesi simo kungenza ukuthi ube nenkinga yokungagayeki kokudla esiswini, kwenze nokuthi uqunjelwe esiswini.

Yikuphi ongakwenza ukulawula nokugwema le nkinga?

- Gxila ekudleni okunempilo nokungenawo amafutha amaningi - wehlise noma uyeke iziphuzo ezine-caffeine eningi, wuphuzo oludakayo nokudla okunoshukela okuningi.

- Khtha izindlela ezilula zokuzivocavoca okungaba wukuhamba nje ushaywe wumoya, ukubhukuda - kukho konke lokho ugweme ukuzixina.

- Phuza amanzi ngokwanele ukusiza ukubuyisa nokunika umzimba wakho amandla owadingayo.

Ukuba nempilo ecolekile kungaphezu kokudla okunempilo nokuzivocavoca kuphela, kepha kudinga nokuthi uthathe izinqumo ozicabangisisile ngempilo yakho. Ukulawula ukugqilazeka komqondo wakho nokucela usizo kungakusiza ukulawula impilo yakho ngendlela efanele.