Bahlela ukukhipha unyawo abansundu koweChampagne & Bubbles Festival
UKwanele Nyawo ongumphathi omkhulu weKhulu Fine Wines ungomunye wabakhiqizi bewayini ababhekwa ngabomvu emcimbini weChampagne and Bubbles Festiva, eSandton.
Image: SITHUNYELWE
KULINDELWE lukhulu kubakhiqizi bewayini abansundu abazoba yingxenye yomcimbi iChampagne and Bubbles Festival, ezobanjelwa e-Inanda Polo Club eSandton ngesonto elizayo.
Kulo nyaka, lo mcimbi waminyaka yonke uzogqamisa ama-Cap Classiques ahamba phambili eNingizimu Afrika okuhlanganisa nabakhiqizi abambalwa abansundu okubalwa kubo i- Amari, House of Azari, Khulu Fine Wines, Nanola Wines nabeSiwela Wines uthembisa lukhulu ekuvuleni amathuba okubamba iqhaza kwabo kwezomnotho embonini yewayini yaseNingizimu Afrika.
Ithimba elingabaholi be-Amari Wines uSiya Maphalala, Luyanda Maphalala, Xolani Mancotywa, noSazi Ngcobo.
Image: SITHUNYELWE
USazi Ngcobo, ongomunye wabasunguli be-Amari uthi lo mcimbi ubanika ithuba lokukhangisa nokudayisa umkhiqizo wabo osezingeni eliphezulu. “Sizothela sithengise i-Amari Lush yethu. Sifuna bonke abazohambela indawo esizobe sidayisela kuyo, bethi bebingelela bebe beqabula ubumnandi obushelelezi obehla esiphundu ngalesi siphuzo esiyi-Cap Classique ethakwe kamnandi nge-Chardonnay, sathi va uju oluncanyaneku ukuyihlanganisa.”
Kulo mcimbi kuzobe kukhona noKwanele Nyawo, oyisikhulu esiphezulu kanye nomsunguli weKhulu Fine Wines nebambisene noNiël van Staden. UNyawo owangena embonini yokukhiqiza amawayini ngemuva kweminyaka eyevile kweyishume esebenzela inkampani yomshwalense. Ehlangene noVan Staden, baqale iMzansi Craft Wine kanye neKhulu ngemuva nje kwalokho.
“Igama lamawayini ethi lithi Khulu, okusho into enkulu, salikhetha ngoba sifuna ukwakha uhlobo lwewayini eliwubukhazikhazi oluhambisana nabo belu, ubukhulu njengoba sobabili sithanda izinto ezinhle ekuphileni.
I-bubbly kaKhulu ibizwa ngokuthi Izigidi.
"I-Blanc de Blanc Cap Classique enhle eyenziwe ngamagilebhisi angu-100% e-Chardonnay futhi yathakwa kahle ngamakha amnandi embali yawolintshi kanye ne-lemon. Ihambisana kahle nokudla okuhlanganisa inhlanzi, amasaladi kanye noshizi," kusho uNyawo.
USiwela Masoga ethelela ikhasimende iwayini lakhe ngokuzethemba.
Image: SITHUNYELWE
Enye intokazi ebhekwe ngabomvu kulo mcimbi, uSiwela Sweetness Masoga, ongumkhiqizi wewayini eliqanjwe ngegama lakhe iSiwela Wines: “Siwela, yigama lesiZulu elichaza ukuwela, ligqamisa uhambo lowesifazane onsundu osemncane ngokuzethemba nothando nempokophelo engena embonini eyaziwa njengephethwe abamhlophe," kusho yena.
Uthi eSiwela Wines bakholwa wukuthi awukho umnqantsa abangeke bakwazi ukuwunqoba ngoba yasungulelwa ukukhuthaza.
“Siyakuthanda kakhulu esikwenzayo futhi silwela ukukhiqiza iwayini eliyingqayizivele nelifinyelelekayo elinekhwalithi engaguquki,” kuphetha yena.
Omunye umkhiqizo obhekwe ngabomvu iNanola Wines, okuwumkhiqizo ophethwe ngowesifazane futhi owakhelwe ngaphansi kwesisekelo somndeni, isiko nemvelaphi. Umsunguli wayo uSilindile Zuma waqala lo mkhiqizo ngenhloso yokuhlonipha uyise ongasekho. Leli gama ngokwalo livela ekuhlanganisweni kwemigomo yothando uyise kaZuma ayembiza ngayo enencazelo egqamisa “amandla abesifazane”.
USilindile Zuma umsunguli nomnikazi weNanola Wines
Image: Sithunyelwe
Emcimbini, i-Nanola Wines izokwethula i-Nanola Crown Brut, inhlanganisela ye-Chardonnay ne-Pinot Noir enamanothi ezimbali ezisawolintshi nembali emhlophe okuholela ekunambithekeni okumnandi kwe-apula. Kukhona futhi i-Nanola Crown Brut Rosé enongwe ngezimbali ezinhle eziveza ingxube yezithako zezithelo zamajikijolo kanye ne-Muscat, edlula kahle emlonyeni, eshiya i-aftertaste ehlala isikhathi eside.
Sivale ngentokazi ezinze ePitoli eyathi eminyakeni emithathu eyedlule yaquga isibindi yalandela iphupho layo lokungena embonini yamawayini. USiphiwe Katjene uzokwethula uhlobo lwakhe lwe-Cap Classique olubizwa nge-House of Azari. Uthi leli gama lisuselwa olimini lwesi-Arabhu futhi lisho “usizo lwaphezulu, ukuthola amandla nokuthemba ongabonwayo nokuba nentshisekelo yokukhulu.”
Le ntokazi izobe ikhangisa ama-Cap Classiques ayo amathathu okukhona kuwo i-Nectar Rosé, i-Pinot Noir Cap Classique enephunga elimnandi lamasitrobheni nama-raspberries, athakwe ngezinongo ezicashile namanothi ezimbali; I-Brut Blanc De Blancs 2020, eyaklonyeliswa ngamaphuzu angama-90 kowe-Tim Atkin 2023 SA Wine Report, eshaya ngezithako zamagilebhisi e-Chardonnay, nobumuncwana bamanothi ama-apula aluhlaza kanye nentwana ye-brioche ethosiwe; kanye ne-Brut Rosé, i-Pinot Noir/Chardonnay enhle kakhulu, enombala opinki okhanyayo enamakha amajikijolo abomvu, ama-cherries kanye namakha e-grapefruit.
Siphiwe Katjene ongumnikazi we-House of Azari
Image: Sithunyelwe