MHLELI: Kwelakho Isolezwe ngivumele ngizwakalise umbono wami ngamacwecwe KaSomnandi (Thokozani Langa) agxila empilweni yaseGoli.
USomnandi phela abantu abaningi abamazi ukuthi udume kangaka nje ngobani ababone ikhono lakhe nokuthi la ekhona ufika nje usukaphi nomculo?
USomnandi wakhipha icwecwe lakhe lokuqala ephrojuswa umalume wakhe uMusa Shabalala ngo-1994 kwi-albhamu Izindaba.
Kuthe ngo-1998, wahlangana noPhathaphatha Ngcobo owaziwa ngokudlala i-keyboard kumaskandi. Ngo-1999 wakhipha Impucuko.
Kwathi ngo-2004 ecwecweni lakhe elalithi Makabongwe wenza ingoma enezinhlamvu ezithi eSoweto ngathola uthando ngathola i-true love, iqhubeke. Kwathi ngo-2006, kwaba nengoma enezinhlamvu ezithi Wabona thina sibuya eGoli sicwebezela nawe wayeka isikole walandela thina, iGoli leli kwanyama kay’pheli.
Kwathi ngo-2008 kwanengoma ethi Sibuya emakhaya le siyofuna umsebenzi edolobheni iGoli lincane, weGoli laphenduka iTopiya, siyafa indlala.
Ngo-2011 ecwecweni lakhe elalithi Protection Order kwanengoma ethi IMbabala eyayithi Impilo inzima eGoli mungasebenzi wobuza kimi ngathwala kanzima, ngangihlala kusukela ekuseni kuze kuyoshona ilanga umlomo umhlophe, ngangilala phansi kombhede ngibizwa ngembabala, ngaphenduka umokoti ehostela ngiphekela abantu.
Kwathi ngo-2012, wakhipha yona ingoma ethi Nganginemali kule minyaka edlule yadliwa intombi yaseSoweto, intombi yayiphila impilo ebizayo.
Ngo-2013 wakhipha icwecwe elalithi Inyakanyaka eyayikhuluma ngalo iGoli.
Kwathi ngo-2015 ecwecweni lakhe elalithi Khuzeka mshana waba nengoma ekhuluma ngeGoli.
Kuthe ngo-2018, wakhipha Iyabuza induna nayo eyayinengoma ekhuluma ngeGoli.
Umculo kaSomnandi uyakufundisa futhi uyakukhulisa ngokomqondo, ukuveza kucace ukuthi indlela eya empumelelweni idlula ebunzimeni.
Nandosi Sangweni
KWACEZA