MHLELI: Ngithi kuShenge, uMntwana waKwaPhindangene, siswele imilomo eyizinkulungwane. Siyabonga ngokwenze egameni lethu njengesizwe samaZulu nabantu abamnyama bezwekazi lase-Afrika.
Sibonga ukusingatha ngesizotha udaba lokudunguzela nokukhothama kweSilo uGoodwill Zwelithini kaBhekuzulu, saze satshalwa.
Akekho omunye obengakhombisa ubuchule obungaka. Ube ngubaba wethu sonke. Ukhombise ukuvuthwa nokungaxhamazeli. Ubumele ubumbano, inhlonipho neqiniso.
Siyazibongela kuSomandla ngokukugcina. Usukumile wathatha indawo yakho.
Akekho obengazama ukwenza okungcono kunalokhu okwenzileyo. Siyabonga ngokungadikibali kwakho yize bekunzima kwesinye isikhathi.
Abanye bazamile ukwenza sengathi bazi kangcono ukwedlula wena. Wena ubazibile, wabeka umqondo wakho ezintweni ezimqoka, washiya ezingathi shu.
Uma sekubhalwa umlando woHlanga loMhlabathi, siyethemba ngeke ushiywe ngaphandle. Uyidlalile indima yakho. Ubenaso Isilo ezikhathini ezimnandi nezinzima. Makhulu amazwi enyosi uma ithi, “Unesibindi Buthelezi ngokukhuthazela umnta kaNdaba, bemthuka bemcokofula, bethi uZwelithini kayikuba nkosi."
Akekho omunye uButhelezi inyosi emshoyo ngaphandle koMntwana uButhelezi. Nguwe owasukuma walwela ukuba Isilo singene esihlalweni.
Siyabonga Shenge! Mageba! USomandla akugcine, akubisise.
Qinisela Hlatshwayo
EKIMBERLEY