MHLELI: Sengathi Mnuz Nkosinathi Mshengu obesakaza uhlelo lomculo wamakhwaya kuKhozi FM cishe yonke inyanga uDisemba angaqhubeka engayeki.
Ungikhumbuze izingwevu ezazisakaza lolu hlelo sisebancane ngeminyaka yo-1990 oMnuz Douglas Mfeka, Joshua Mlaba nabanye. Ngapha kwiSABC1 bangikhumbuze Mnuz Thulasizwe Nkabinde.
Babedlala izingoma ezimnandi zabaqambi bakithi oMnuz Khulekani Magubane, Norman Sibisi LMB Chonco nabanye abaqambi bakithi.Nalo dadewethu obeluphethe ngeSonto mhla ka- 9 Januwari naye ubeza kahle impela ngiyamncoma.
Ngagcina nini nje ukuzwa izingoma ezixoxa indaba kaChonco, Hheshe Nsizwa nethi Ingqwele? Ngagcina nini ukulalela izingoma zikaSolwazi Mzilikazi Khumalo ze-Opera? Ngibonga noMnuz Michael Ngubane osakaza lolu hlelo kwiKhwezi FM.
Usayibambe kahle impela. Ngayo le nyanga ngonyaka odlule mhla ka-28 kwashona indlovukazi yalo mkhakha esikhuluma ngawo uNkk Sibongile Khumalo. Siyamkhumbula alale ngoxolo.
Phila N Mthethwa
EMPANGENI