Incazelo ngesimemezelo somthandazo wokukhumbula iSilo

MHLELI: NGATHINTWA yiNdlovukazi uMaZungu, engunina weSilo futhi esaphila, njengoba nguyena owayegane iSilo saKwaKhethomthandayo, iNgonyama uCyprian Nyangayezizwe Bhekuzulu, esizala iSilo sethu esikhotheme, iNgonyama yaKwaKhangelamankegane.

INdlovukazi yangazisa ukuthi ithintwe ngabantabayo beNdlunkulu, abafelokazi beSilo esisanda kukhothama. Bathi bacela ukuthi ngosuku iSilo, umyeni wabo, esakhothama ngalo uMashi 12, benze umthandazo wokukhumbula uMdlokombane, umyeni wabo. Bathi nami kangimeme. Kwangathi neSilo sakwamukela njengomqondo omuhle.

Inkinga yasidaleka nxa bona abafelokazi beSilo, iNdlunkulu, bethi umthandazo kawenziwe esigodlweni saKwaKhethomthandayo. ISilo sasho ukuthi ngeke saphumelela ukuba semthandazweni oyokwenziwa KwaKhethomthandayo, ngezizathu ezisobala. Ngaphandle kokuthi wonke amacala abehlulelwa yiJaji uMadondo, ayefakwe enkantolo yiNdlunkulu yaKwaKhethomthandayo, okuwuNdlunkulu uMaDlamini namadodakazi akhe, uMntwana uNtandoyenkosi, nodadewabo uMntwana uNtombizosuthu. Isizwe sonke sizibonele nakuthelevishini uMntwana uNtandoyenkosi esichapha iSilo ngokuthi uthi sizenza iSilo singakabekwa, nokuningi abekusho nangokukhulekelwa kwaso.

Nathi esisesekelayo iSilo, ngeke saphumelela ukuya emthandazweni osendaweni, lapho iSilo esiyiNkosana neNdlalifa yeSilo esikhothemeyo, esesithe asiyi kuyo.

Ngaphandle kwalokhu, abantwana neNdlunkulu sebeshilo ukuthi kwaba liphutha-nje kwakhona ukuba ekukhothameni kweSilo, siphumele KwaKhethomthandayo, hhayi emzini waso oyikhanda laso KwaKhangelamankengane. Ngakho-ke bathi kakufanele ukuba kuqhutshekwe nephutha lokwenza imisebenzi yoBukhosi neNkosi komunye umuzi, ngaphandle kwekhanda likayise esigodlweni saKwaKhangelamankengane.

Okufanele kucacele isizwe wukuthi besikutusa sonke okwenziwa ngabafelokazi beSilo, indlunkulu. Okwenzekile wukuthi indlunkulu yeSilo isazisile ukuthi njengoba izwelonke lazi, ukuthi uhulumeni wesifundazwe wathi akukho azokukhiphela imali okuyimisebenzi yaseNdlunkulu, koze kubekwe iSilo. INdlunkulu yeSilo isuke yacela kuMhlonishwa uNdunankulu, ukuthi ngeke yini ayelekelele ngezindleko zokudla ngosuku lomthandazo weNdlunkulu ngoMashi 12, 2022.

Nakhu-ke sesibona uNdunankulu uMhlonishwa uMnuz Zikalala, esekhipha isimemezelo sokuthi yena nesigungu sikahulumeni wesifundazwe, bazokwenzela iSilo inkonzo yesikhumbuzo ngouosuku esakhothama ngalo, ngoMashi 12, KwaKhethomthandayo. Ngenxa-nje yokuthi abafelokazi beSilo bacele usizo lwemali yokudla, uNdunankulu usethi lona wumcimbi kaHulumeni. Akusashiwo lutho ngomthandazo obucelwe yiNdlunkulu yeSilo esikhotheme.

MANGOSUTHU BUTHELEZI

UNDUNANKULU WESILO NOZULU