BAJABULA bodwa abazali abahlele ukuzikhipha nemindeni yabo ngamaholidi ePhasika njengoba usuphothuliwe umsebenzi wezinyanga ezingu-14 wokulungiswa kweMeropa Casino and Entertainment World.
Le ndawo isebenzise imali elinganiselwa ku-R2.5-million, ukuthuthukisa izindawo ezizojabulisa omuntuza njengendawo yezilwane iWildThingz Bird and Reptile Park, indawo yamanzi yokudlala kanjalo nemishini emisha efana nesitimela esizungeza yonke le ndawo.
IWild Thingz izothokozisa abanesibindi abazithandayo izilwane njengoba kwenziwa imibukiso yezinyoka njalo ngoLwesibili kuze kube yiSonto, kusukela ngo-9am kuze kube wu-5 ntambama. Ngale kombukiso wezinyoka, kukhona nethuba elihle lokufunda ngezilwane ezahlukene ezikhona kule ndawo.
Ngale kwendawo yezilwane, kungezwe imishini eyahlukene yokudlala, isitimela esizungeza yonke indawo ne-swimming pool engu-25m ezosetshenziselwa imidlalo eyahlukene yasemanzini okundalwa kuyo i-pool basketball, water gun battles, freeze tag, airball, diving Olympics, belly flop nokunye okuningi. Bakhona nabaqaphi abaqeqeshiwe abahlala eduze beqaphe isimo.
UMnuz Sammy Mokhele ongumphathi-jikelele kule ndawo uthe bawalindele ngabomvu amaholidi ezikole, bamukele izinkumbi zabantu abafuna ukuthokozisa izingane zabo.
“Okuhle kakhulu ngezinguquko ezenziwe wukuthi umuntu angafika noma yinini ehamba nezingane zakhe bazijabulise. Likhona nethuba elihle lokwenza amaphathi ezingane kule ndawo ngoba kuningi kakhulu okuhlelelwa zona ngqo izingane” kusho yena.
Uthi iMeropa ingenye yezindawo ezibaluleke kakhulu kwezokuvakasha nokungcebeleka eLimpopo, yingakho besebenze kanzima ukuyithuthukisa le ndawo ukuze yengeze izinto zobumnandi ezidingwa ngabantu abadala nezingane.
Ngale kwezinto ezidingwa womuntuza, uMokhele uthi igceke livulekile futhi notshani buhle buyaphephezela kulabo abathanda ubumnandi nokuhlela imicimbi yokujuxuza.