UMPHATHISWA woMnyango wezokuThuthukusa uMnotho, ezokuVakasha nezoKongiwa kweMvelo KwaZulu-Natal, uMfu Musa Zondi, usememezele ukuthi umnyango awuholayo usuziphonsele inselelo yokudoba iso lezivakashi nabatshalimali basemazweni omhlaba ako-Europe nase-Asia ukugcwala embukisweni waminyaka yonke wezokucobelana ngezamabhizinisi nezokuhwebelana, i-Africa’s Travel Indaba, eqale e-ICC, eThekwini, izolo.
UZondi ubekhuluma esidlweni sakuseni eHilton Hotel, eThekwini, sokwendlalela ukuvula lo mcimbi ozosongwa ngoLwesine. Kulo mcimbi kubuthene izinkulungwane zabantu abadabuka emazweni ase-Afrika awu-27, inhloso yawo ukufukula umnotho wesifundazwe, owezwe iNingizimu Afrika nezwekazi i-Afrika yonkana.
Uthe abafuni ukuthi lo mbuthwano uphelele e-Afrika kuphela yingakho sekuqale uhlelo lokuthi kube namabhanoyi azokwazi ukusuka emazweni ehlukene ase-Europe nase-Asia eze ngqo esikhumulweni sezindiza esiseThekwini iKing Shaka International Airport.
Ngalokhu kuzoba lula ukufinyelelea ezindaweni ezahlukene ezingenisa imali eKZN.
Udalule nokuthi umnyango wenza konke okusemandleni awo ukuphuthumisa uhlelo lwe-Cable Car, okuyizithuthi ezihamba entabeni, ezizojabulisa izivakashi abahlela ukuthi zibe khona ezintabeni zoKhahlamba maduze nje.
IMeya yoMkhandlu weTheku, uMnuz Cyril Xaba, nayo idalule izindaba zokuthi inkampani yezindawo zokulala, iSouthern Sun, isitshale u-R1 billion wokulungisa amahhotela ayo eThekwini okukhona kuwona iMaharan Hotel, Elangeni Hotel, Garden Court South Beach ne-The Edward Hotel, ukwenza impilo ibe lula kwizivakashi ezizothutheleka kuleli dolobha.
Kuwo futhi lo mcimbi kwethulelwe izethameli uhlelo oluchaza kabanzi ukuthi kuzoba kuhle kanjani uma sekuphothulwe uhlelo lokulungisa iMpilo Safari Lodge eseHluhluwe, enyakatho yeKwaZulu-Natal. Le ndawo izoba namagumbi okulala awu-75, kanti kuzokwenziwa nohlelo lokuthi umuntu akwazi ukufika ngendizamshini kuyona.
Ukwakhiwa kwale ndawo yezokuvakasha kwakhe amathuba emisebenzi awu-1 200 neminye futhi ewu-1 500, kanti ngenkathi sekumatasa kakhulu yakhiwa - bese kuba nabasebenzi abawu-1 400 kuyona nsuku zonke. Ibhekelelwe yizinkampani zezokwakha eziwu-17 neziwu-250 ezincane ezilekelela ukuphuthumisa umsebenzi oqhubeka khona.