IMEYA yomkhandlu weTheku uMnuz Cyril Xaba, imemezele ukuthi umcimbi omkhulu nohlonishwayo ezweni nasezwenikazi i-Afrika, iHollywoodbets Durban July, uzongenisa imali elinganiselwa ku-R278 million, emnothweni wedolobha. Lo mcimbi uzobanjelwa eHollywoodbets Greyville Racecourse eThekwini, ngoMgqibelo.
UXaba usho kanje ekhuluma esithangamini nabezindaba zokwethula lo mcimbi ngokusemthethweni ebesisenxanxatheleni yezitolo iWestown, eShongweni.
"Siyakuqinisekisa ukuthi sesimi ngomumo ngayo yonke indlela ukusingatha lo mcimbi ngempumelelo njengoba sihlale senza kuyo yonke le minyaka siwusingatha. Kuyasijabulisa ukuthi imali ezongena iwu-R278 million, ngokusetshenziswa ngabantu abazobe bezijabulisa ngezindlela ezahlukene, izosiza ukuthi lithuthuke kubhekwe phambili. Phezu kwalokho, sibheke ukuthi ngale mpelasonto nje kuphela kwakheke amathuba omsebenzi angaphezu kuka-4 000 okuyinto enhle kakhulu ezoba wusizo ebantwini abadinga lawo mathuba," usho kanje.
UXaba uthe abakwasidlodlo nabo bazobe behlome bephelele ukubhekana ngeziqu zamehlo nezephulamthetho ezisophe ukunyomfa injabulo yabantu abazobe behambele idolobha iTheku namaphethelo ngale mpelasonto.
"Amaphoyisa azobe enkanise idolobha lonke ukuqinisekisa ukuthi konke kuba yimpumelelo futhi nakwezinye izindawo ezingaphandle kwedolobha azobe elindele noma yini engase iphazamise injabulo yabantu bakithi. Asesabi lutho ngoba kade sasisingatha imicimbi efuze lona phambilini," usho kanje.
Lo mcimbi ukhuza ibuya ihlandla lika-129 nonyaka, ingqikithi yawo ithi Marvels of Mzansi, okusho ukuthi kuzosetshenziswa ingqephu ukuqhakambisa ubuhle bamasiko aseNingizimu Afrika nezwekazi i-Afrika yonkana.
Amathikithi okubuka lo mcimbi abiza kusuka ku-R230 umuntu emunye, kuthi elokupaka libize u-R170 imoto ngayinye.