IMPELA okuhle nomusa kuyamlandela umlingisi owazakhela udumo ngokulingisa efilimini eyahlabana kuma-Academy Awards, iTsotsi, uTerry Pheto, njengoba esanda kuqokwa emqhudelwaneni wezindondo waphesheya kwezilwandle, iBritish Urban Film Festival (Buff) Awards.
UTerry, oke walingisa nakwiThe Bold and The Beautiful, ungene emnxeni weBest Actress ngokudlala indawo eqavile efilimini esihloko sithi Faces.
Lesi singqazu esavumbululwa nguKere Nyawo noThulani Didi wodumo lukaPopeye noSpinach kwiZone 14, sithe kuyinto esemqoka kakhulu kusona ukuqhathwa nezingwazi zabalingisi bamazwe ngamazwe.
“Kuhle ukusebenza nabalingisi nabenzi bamafilimu abaseqophelweni eliphezulu basemhlabeni jikelele.
“Kuwo wonke umsebenzi engiwenzayo, ngiphuma sengihlome ngolwazi olunzulu. Ukuqokwa emqhudelwaneni okuleli zinga kwenze injabulo yami yadlulela,” kusho uTerry esitatimendeni esithunyelwe kwabezindaba.
Kulo munxa uqhathwe no-Elnor Machen-Fortino, Sey Shay no-Anna Ranson.
Uma egcina edle umhlanganiso, kuzobe kungekhona okokuqala uTerry ehlabana emqhudelwaneni ohlanganise amazwe ngamazwe. Wake wakhala wemuka nendondo yeBest Supporting Actress kuma-Africa Academy Awards ngo-2012 ngokulingisa efilimini eyayithi How to Steal 2 Million.
Useke walingisa kweminye imidlalo eseqophelweni lomhlaba, okubalwa kuyo iGoodbye Bafana, Catch a Fire, A United Kingdom nothi Madiba.
Le filimu ekhishwe nyakenye, enabalingiswa abaqavile abane, yaqoshwa eLondon. Kodwa iqondiswe ngumqondisi odabuka eNigeria, uJoseph Adesunloye.
Kubalingisi ababoshelwe kule filimu kubalwa noShingai Shoniwa wodumo kwiThe Noisettes, Aki Omoshaybi (The Riot Club, Kids In Love, Star Wars: The Last Jedi), Suzette Llewellyn (EastEnders, Coronation Street, Holby City) nomkhangisi wengqephu waseFrance, uMatthieu Charneau (The Bastard Executioner).
I-Faces yaqala ukukhonjiswa kwi-39th Durban International Film Festival (DIFF) nyakenye njengoba izobe seyikhonjiswa okwesibili kulo nyaka kwiBUFF ngoSepthemba 1 kuze kushaye umhla ka-7, okuyiyona filimu okuzobe sekuvalwa ngayo leli dili lamafilimu.