UQOPHE umlando umethuli wezinhlelo osizakhele igama endimeni yobumnandi, uSomizi Mhlongo, okuvele izindaba zokuba ngowokuqala owesilisa ukuba yinxusa lakuleli lenkampani yeziphaqulo zaphesheya kwezilwandle iBlack Opal.
Le nkampani imemezele lezi zindaba ekhasini layo enkundleni yokuxhumana u-Instagram,ngoLwesibili.
Ekhasini lakhe ku-Instagram uSomizi ufake isithombe sakhe echaza ngenjabulo anayo ngokuthola ithuba elifana naleli.
"Umzuzu obalulekile futhi ongumlando lona. Bantu bakithi ngizizwa ngithobekile ukunethulela ubuso obusha be @blackopalsa. Ngibe owesilia wokuqala ukumela inkampani yeziphaqulo. Uma uNkulukulu ekuphakamisa kuba njena," kusho uSomizi.
Iningi liyibongele le nsizwa okuyihambela kahle endimeni yobumnandi njengoba itholakala ezindaweni eziningi futhi inohlelo olukhuluma ngempilo yalo kuMzansi Magic.
Osaziwayo okukhona kubo uKelly Khumalo bambongele ngokuthola ithuba eliyingqayizivele.
A post shared by Black Opal SA(@blackopalsa) on May 22, 2018 at 12:38pm PDT
Khonamanjalo, uSomizi uzophindele ethule amaSouth African Music Awards nakulo nyaka. Uzokwenza lomsebenzi ngokubambisana noLerato Kganyago, nosomahlaya uMpho Poops. Lo mcimbi uzokhonjiswa bukhoma kuSABC 1 ngoJuni 2 ngo 8 ebusuku.