Umsakazi webhola ufuna ukucija intsha

UMSAKAZI wezemidlalo yebhola kuSuperSport, uReggie "Mapensela" Ndlovu, uzimisele ngokusebenzisa amava asenawo nolwazi aselutholile ukucija intsha yasemakhaya neyasemalokishini efuna ukuhamba ezinyathelweni zakhe. 

UReggie ukhulume kanje emuva kokuthweswa iziqu zePost Graduate Certificate in Education egxile kwiCreative Arts (Senior Phase) and Dramatic Arts (FET) abezenza esikhungweni iStadio Higher Education.

Lesi silomo sasendaweni yaseNgwebini, eNquthu, siphumelele lezi zifundo ezisithathe unyaka ngamalengiso njengoba sizuze o-distinction abane. UReggie ubonge kakhulu uNkulunkulu ngokumnika ugqozi ukuze aqhubeke nokusakaza ibhola ngendlela abalandeli abathi iyabakitaza. "Ngibona ukuthi sikhulu isipiliyoni esengisizuzile emkhakheni wezokungcebeleka njengoba ngaqala ukusebenza ngemuva kwekhamera kuMuvhango ngadlulela kuScandal, Rhythm City, Generations:The Legacy, ukubalwa imidlalo embalwa."

Uthe ufisa ukuthuthukisa ikhono lentsha yasemakhaya nasemalokshini.

"Ngifisa ukukhiqiza izihlabani zabalingisi abazokhula babe ngabaqondisi abanohlonze. Ngifuna basike iphethini ezingqalabutheni ezinjengobaba uGibson Kente, Mbongeni Ngema, Duma kaNdlovu noMfundi Vundla. Okunye okusenyongweni yami ukukhiqiza abasakazi bebhola bangomuso. Nami ngazalelwa emakhaya kodwa ngakwazi ukubhukula ngaze ngafika kuleli zinga esengikulona."

UReggie ugile izimanga nyakenye, ngesikhathi edla umhlanganiso kumaZikomo Africa Awards ngaphansi komkhakha weSports Personality of the Year.

Ufunde eDundee Primary, wadlulela eCasino Primary, eNgwebini Primary, Ndlelanhle Secondary eNondweni, eLangazela High,  Ekucabangeni High  naseMzamo High eNewcastle.

Uthe ulidlale kakhulu ibhola esefunda eMonash University.

"Ngangifisa ukudlala ezingeni elikhokhelwayo kodwa izifundo zami engangizenza eDUT, zangibamba phansi ngagcina ngidlala nje," kusho le nsizwa eyingane yesithathu kweziyisithupha elamana nazo.