IMBONGI elingisa indawo ka-Omphile kwiScandal!, uBotlhale Boikanyo, ihlengezele izinyembezi iphumelela uGrade 12 ngamalengiso.
Leli ciko, ebelifunda esikoleni esizimele iSt Stithians Girls’ College, liphase ezinye izifundo ezimbili ngo-distinction.
“Ngiyakhala njengamanje,” ubhale kanje uBotlhale (17) ekhasini lakhe lakuTwitter.
Yize engatholakalanga ukuba aphawule kodwa wakuveza ukuthi ukuhaya izinkondlo nokulingisa akumphazamisi ezifundweni zakhe. “Ngifuna uma sengiphothule isikole ngiyokwenza izifundo zeChartered Accountant.”
Ukuphumelela kwakhe akuthusi ngoba isiqubulo sakhe sithi “Ukuhlanganisa iMfundo noJesu kuphuma iMpumelelo.”
Le ntokazi yaseMahikeng, eNorth West, yaqala ukwaziwa ngesikhathi idla umhlanganiso emqhudelwaneni waku-e.tv, iSA’s Got Talent .
Ngemuva kokuhlabana, uBotlhale wabe eseqopha iCD esihloko sithi Spoken Word & Music, eyayigabe ngenoni elalithi Africa My Pride.
Ngemuva kwalokho ube esehlabana ngendondo yeBest Praise Singer kumaSatma Awards futhi uyinxusa lokuqala elincane kunawo wonke lalo mqhudelwano wezindondo.
Ubuye waqokwa njengenxusa lomkhankaso weNelson Mandela’s Children’s Hospitai iLegacy of Hope ngesikhathi wethulwa eNew York e-USA .
Wabe esehlonishwa yiBrand SA ngokuhlonipha uMandela ngenkondlo kaMaya Angelou e-USA.